Саха норуотун номоххо киирбит национальнай дьоруойугар, бастакы импровизатор-поэт, олоҥхоһут Манчаары Баһылай төрөөбүтэ 220 сылыгар, Мэҥэ Хаҥалас улууһа төрүттэммитэ 95 сылыгар анаан Манчаары албан аатын, Манчаары аман өһүн үйэтитэр, кини туһунан номохтору, үһүйээннэри киэҥ эйгэҕэ тарҕатар сыаллаах өрөспүүбүлүкэтээҕи ойуулуктары уонна аудионан уус-уран ааҕыыны көрүүгэ онлайн-куонкурус биллэриллибитэ. Куонкуруска өрөспүүбүлүкэ араас муннугуттан 139 киһи кыттыыны ылла. Ол курдук, ыраах Үөһээ Дьааҥы улууһун Суордаах, Арыылаах нэһилиэктэриттэн, Аллайыахаттан, Манчаары көмүс уҥуоҕа харалла сытар Ньурба улууһуттан, Тааттаттан, Амматтан, Чурапчыттан, Намтан, Дьокуускай куорат 19, 23 нүөмэрдээх орто оскуолаларыттан, А. Д. Макарова аатынан Дьокуускайдааҕы култуура, искусство кэллиэһин устудьуоннара, Мэҥэ Хаҥалас улууһун нэһилиэктэриттэн кытыннылар. Дьүүллүүр сүбэҕэ үлэлээтилэр: Мэҥэ Хаҥалас улууһун култууратын уонна духуобунай сайдыытын салалтатын информационнай-методическэй киинин салайааччыта, дьүүллүүр сүбэ бэрэссэдээтэлэ – Г.А.Сосина, Д.Ф. Ходулов аатынан норуот айымньытын дьиэтин үүнэр көлүөнэ театрын режиссера, СӨ култууратын туйгуна А.С.Скрябина, Мэҥэ Хаҥаластааҕы кииннэммит бибилэтиэкэ ситимин тэрийэр-методическэй киинин сэбиэдиссэйэ Н.С.Басова, М.И.Брызгалова аатынан Майатааҕы оҕо бибилэтиэкэтин сэбиэдиссэйэ, СӨ култууратын туйгуна О.Н. Дьяконова. Манчаары хорсун быһыылара, батталы-атаҕастабылы утары охсуһуута, кыаммакка, кырдьаҕаска үтүө сыһыана бу ойуулуктарга, уус-уран ааҕыыларга сиһилии арылынна. Кыттааччылар ойуулуктары оҥорууга бэйэлэрин уруһуйдарын, пластилины, легоны, оҥоһуу өйү туһанан Манчаары уобараһын чаҕылхайдык тиэрдибиттэр. Ойуулуктары көрүүгэ түмүгэр Ньурба улууһун Ньурба куоратын “ЦЦОД IT-куб” кэлэктиибэ (салайааччылара Титигирова С. А., Семенова А. А.) — Дипломан аатын сүктэ; Аудионан уус-уран ааҕыы көрүүтүгэр кыттааччылар Манчаары Баһылай эрэй эҥэрдээх очурдаах олоҕун, утарсыылаах сырыыларын, батталы утары охсуһуутун туһунан номохтору, үһүйээннэри, суруйааччылар айымньыларын дорҕоонноохтук ааҕан ыыттылар. Олус элбэх үлэ киирбититтэн аудионан уус-уран ааҕыыга Дипломан аатын ылла — Попова Ньургуяна Николаевна (Ньурба улууһун Малдьаҕар нэһилиэгин “Чуораанчык” оҕону сайыннарар киин иитээччитэ); Күрэх кыайыылаахтарын эӄэрдэлиибит! Инникитин даӄаны кэлэр кэнчээри ыччаттарбытыгар төрөөбүт дойдуларыгар тапталы, дойдуларын устуоруйатын, хайдах, туох дьон төрөөн-үөскээн ааспытын билиһиннэрэргэ, сахалыы ааҕыыны тарҕатарга, сахабыт тыла, төрүт дорҕоонноро сүппэтин туһугар туруулаһарга бибилэтиэкэни кытта тэҥҥэ үлэлэһиэхтэрэ диэн туран улахан махталбытын тиэрдэбит!
Информационнай-методическай салаа
