Саха тыата баар буоллаҕына, саха тыына баар буолуоҕа.

Саха тыына баар буоллаҕына, саха тыла баар буолуоҕа.

Саха тыла баар буоллаҕына, саха омук баар буолуоҕа!        

  Иван Горнай.

Общественница, спортсменка, энтузиаст Гаврильева Светлана Дмитриевна көҕүлээһининэн, өрөспүүбүкэҕэ «Үрүҥ торуоска»  (алтынньы 15 күнүттэн сэтинньи 13 күнүгэр диэри) декада чэрчитинэн, алтынньы 22 күнүгэр Н.И. Харитонов – Чуор аатынан култуура дыбарыаһыгар  көһө сылдьар «Ааҕар балаҕан сонуннара» ааҕар саалата үлэлээтэ. Ити күн таһырдьа тохтообокко хаар түһэр, халтараан бэрдэ буолан, кырдьаҕас, кыаммат дьоммут кыайан кэлбэтилэр. Инньэ гынан, кэлбит аҕыйах ахсааннаах дьоммутугар былааннаммыт тэрээһиммитин, тохтоппокко ыыттыбыт.

Иван Николаевич Егоров-Иван Горнай – биллэр бэйиэт уонна публицист, педагогическай үлэ бэтэрээнэ, Брайл систиэмэтинэн саха алпаабытын оҥорооччу, саха норуотуттан бастакы тифлопедагог, СӨ Суруйааччыларын сойууһун чилиэнэ, СӨ култууратын үтүөлээх үлэһитэ, СӨ үөрэҕириитин туйгуна, “Гражданскай килбиэн” бэлиэ хаһаайына.

1992 сыллаахха бэйиэт бастакы кинигэтэ «Мин көрөбүн сүрэхпинэн» диэн ааттанан, Горнай оройуонун типографиятыгар бэчээттэнэн тахсыбыта. Ол курдук, хоһооннорун, поэмаларын уопсайа 12 хомуурунньукка сырдаппыта. Кини аатын үйэтитэр сыалтан Дьокуускай куоракка баар Көрбөттөр уонна мөлтөхтүк көрөөччүлөр өрөспүүбүлүкэтээҕи анал библиотекатыгар 2023 сыллаахха Иван Горнай аата иҥэриллибитэ.

Егоров И.Н. — Иван Горнай олоҕун, айар үлэтин туһунан бэсиэдэтин кэнниттэн истээччилэр «Мин дойдум — Саха сирэ» диэн тургутукка эппиэттээтилэр. Тургутукка араас хабааннаах боппуруостарга эппиэттэспит кыттааччылар Светлана Дмитриевна бэйэтэ спонсордаабыт бириистэрин тутан үөрдүлэр-көттүлэр.

Салгыы «Ааҕар Ньурба» диэн буккроссинг быыстапкаттан сөбүлээбит кинигэлэрин бэлэх ыллылар.

Ф.Г. Сафронов аатынан оройуоннаҕы модельнай библиотека ааҕааччыны кытта үлэлиир салаата.