ҮТҮӨ СОНУН-САҤА КИНИГЭ.

Саҥа сыл саҕаланыытыгар Ньурбатааҕы киин бибилэтиэкэҕэ дьоһун бэлэҕи Күндээдэ нэһилиэгин олохтооҕо Акулина Николаевна Романова оҥордо. Ол курдук, Малдьаҕартан төрүттээх, 1960 с. саҕаланыыларыгар Саха араадьыйатыгар редакторынан олус айымньылаахтык үлэлээбит, СССР суруналыыстарын Сойууһун чилиэнэ, кылгас эрээри чаҕылхай олоҕу олорбут Михаил Кириллович Николаев туһунан «Моя судьба» кинигэнэн бибилэтиэкэбит фондата хаҥаата. 160 сирэйтэн турар, сахаллы-нууччалыы тылынан кинигэни Николаева Алевтина Алексеевна, Борисов Виктор Борисович – Барыыс уола Алтан Түһүнэй хомуйан оҥорон 2024 сыл бүтэһик ыйыгар бэчээттэнэн тахсыбыт.

«Моя судьба» кинигэ Николаев М.К. дневнигиттэн саҕаланар уонна аймахтарын, доҕотторун ахтыыларынан түмүктэнэр. Кини баара суоҕа 34 саастааҕар ууга түспүт дьону быыһыы сылдьан олдоҕо быстыбыт.  Хаартыскалары, хаһыаттан ыстатыыйалары, дөкүмүөннэри түһэрэн киллэрбиттэрэ кинигэ ис хоһоонун байытар.  Михаил Кириллович Николаевка анаан 2021 сыллаахха «Олох омоон суолунан» араадьыйанан биэрии куар кодунан киирбитэ биир дойдулаахпыт аатын үйэтитиигэ дьоһун үлэ.

Николаев М.К. олоҕун суолун сырдатар кинигэ- Сахабыт сирин ааспыт үйэ 60 сылларын историята.

Ньурбатааҕы киин бибилэтиэкэ ааҕааччылара саҥа кинигэни уларсан ааҕан биир дойдулаахпыт дьылҕатын билсиҥ!