БУ КҮН ЭҺИГИ куйаар ситимин нөҥүө РФ үөрэҕириитин туйгуна, Учууталлар учууталлара Розалия Софроновна Бушкова өр кэмҥэ муспут матырыйаалларын көрүҥ, сэргээҥ!
Юрий Алексеевич Гагарин Кулун тутар 9 күнүгэр 1934 сыллаахха Смоленскай уобалас Клушино дэриэбинэтигэр төрөөбүтэ. Кини, киһи аймах историятыгар аан маҥнай космос куйаарыгар тахсыбыт киһи — космонавт буолар. Муус устар 12 күнүгэр 1961 сыллаахха. Ити сыл Юрий Гагарин туһунан маҥнайгы кинигэ тахсыбыта «Пилот звездного корабля» диэн. Бу кинигэни эдьиийим Светлана Софроновна Якутскайтан аҕалбыта. Онтон ыла космос, космонавтар тустарынан кинигэлэри иккиэн атыылаһан мунньан барбыппыт. Коллекцияҕа диэн анаан буолбакка — интэриэһиргээн сүгүрүйэр маҥнайгы космонавпыт туһунан билээри, үйэтитээри. Биһиги көлүөнэ дьоно истиҥник ис сүрэхпититтэн сүгүрүйэр геройбут буолар.
Муус устар 12 күнүгэр Юрий Гагарин аан бастаан космоска көппүт күнүн бары да үчүгэйдик өйдүүр буолуохтаахпыт, туохха да тэҥнэммэт үөрүү, дьол, киэн туттуу барыбыт сүрэҕэр олохсуйбута. Чугас киһибит курдук хас биирдии ыал дьиэтигэр киирбитэ. Миэхэ тус олохпор Юрий Алексеевич Гагарин аата наһаа чугас, суолталаах. Ол курдук 1962 сыллаахха космонавтика күнүгэр комсомол кэккэтигэр киирбитим. Ньурбачаантан сатыы киирэн, долгуйа-долгуйа Райкомол бастакы секретара Н. И. Харитоновка киирэн, араас боппуруостарга эппиэттээн Комсомолга киирэн дьоллонон, үөрэн, эмиэ атын иэйии сүрэхпитин толорбута. Кэлин 10 сыл Убайаан оскуолатыгар Ю.А. Гагарин аатынан пионерскай дружинаҕа пионер баһаатайынан үлэлээбитим. Сыл аайы космонавтика күнүгэр космическай КВН, пионерскай линейка, Юрий Гагарин туһунан тылынан сурунаал, араас тэрээһиннэр ыытыллаллара. Биһиги дружинаҕа кини аата элбэхтик ааттанара. Төрөөбүт күнэ миэхэ эмиэ чугас. Кини Кулун тутар 9 күнүгэр төрөөбүт буоллаҕына мин Кулун тутар 10 күнүгэр төрөөбүт күнүм. Бу кинигэлэр, открыткалар барыта Советскай кэмҥэ тахсыбыттара. “Звездный городок”, “Три, два, один — пуск!” диэн кинигэлэри Юрий Алексеевич Гагарин аатынан пионерскай дружина Советын председателя туйгун үөрэнээччи Петрова Марфа бэлэхтээбитэ. Юрий Гагарин оҕолору кытта көрсүһэн турар хаартыската А.И. Токусарова бэлэҕэ. «Кругозор» сурунаалга Юрий Гагарин суруллубут пластинката баар. Хаһыаттан, сурунаалтан матырыйааллар, значоктар, бары космонавтар уонна космос туһунан кэпсииллэр.
Билиҥҥи кэмҥэ космоска көтүү күннээҕи көстүү курдук буолбут кэмигэр, оҕолор интириэстэрэ мөлтөөбүт курдук. Саатар маннык бэлиэ күннэргэ оҕолорго санатан, сырдатан кэпсээн ааһарбыт буоллар оҕолор интэриэһиргиэ, өйдөрүгэр, санааларыгар тутуо этилэр. Төрөөбүт дойдуга таптал, киэн туттуу санаата үөскүө этэ» диэн санаатын үллэстэр Розалия Софроновна Бушкова.
Муус устар 12 күнүгэр 15:00 чааска Розалия Софроновна быыстапкатын тула кэпсэтиигэ ааҕааччыларбытын күүтэбит!
