Бүгүн, кулун тутар 26 күнүгэр, Ф.Г. Сафронов аатынан киин бибилэтиэкэҕэ улууспут биллэр-көстөр педагога, РФ уопсай үөрэхтээһинин бочуоттаах үлэһитэ, хоһоонньут уонна тылбаасчыт Аркадий Спиридонович Mоякунов – Мойокуун Индеев ахтыы кинигэтин сүрэхтэниитэ үрдүк таһымнаахтык ааста.

«Ытык аҕа аата – ыччатынан салҕанар» диэн ааттаах бу саҥа кинигэ – Аркадий Спиридоновиһы киһи, кэргэн, аҕа, доҕор, уһуйааччы уонна сырдыкка угуйааччы быһыытынан үйэтитиигэ ананар. Кинигэни бэлэмнээһиҥҥэ кэргэнэ Евдокия Ивановна уонна кыыһа Августина Аркадьевна Моякуновалар элбэх сыллаах тиргиллээх үлэни ыыттылар. Кинигэни таһаарыыга «Ньурба» хаһыат кылаабынай редактора Лена Ивановна Петрова редактор быһыытынан үлэлээтэ, оттон «Дани-Алмас» бэчээттиир хампаанньа тахсыытын хааччыйда.

Култуура үлэһиттэрин күнэ уонна «Айар» национальнай кинигэ кыһата төрүттэммитэ 100 сылыгар аналлаах бу бэлиэ тэрээһиҥҥэ бибилэтиэкэ саалатыгар дьон тоҕуоруһа муһунна. Кинигэ сүрэхтэниитигэр улуус салайааччылара, култуура эйгэтин үлэһиттэрэ, чугас аймахтара, үөрэнээччилэрэ, бииргэ алтыспыт үөлээннээхтэрэ уонна кэллиэгэлэрэ, үгүс ыалдьыттар мустан, Аркадий Спиридонович Ньурба улууһугар уонна Саха Өрөспүүбүлүкэтигэр киллэрбит сүҥкэн улахан кылаатын, кини педагогикаҕа уонна айар үлэҕэ суолун-ииһин итиитик-истиҥник ахтан-санаан аастылар.

Ньурба улууһун дьаһалтата Аркадий Спиридонович Моякунов – Мойокуун Индеев аата уонна кини хаалларбыт үтүө айымньылаах үлэтэ үйэлэри уҥуордаан, салҕыы сайда, ааттана турдун диэн баҕарар.

Үтүө киһи аата – үйэлээх!

Ньурба улууһун дьаһалтатын пресс-сулууспата

 Александр Егоров хаартыскалара