Балаҕан ыйын 11 күнүгэр Ньурбабыт сиригэр үгэскэ кубулуйбут «Ньурба күһүнэ» тэрээһин Ньурба куоратынан, Ыраах Убайаанынан, Дьиикимдэ нэһилиэгинэн ыытыллыаҕа.
Бастакы 1989 сыллаахха ыытыллыбыт «Ньурба күһүнэ» республикабыт араас муннуктарыттан сүүһүнэн ахсааннаах суруйар-айар дьону түмпүтэ. Кинилэр саха дьахталларыттан бастакы поэт Варвара Потапова дьиэтинэн, Ньурба бастакы суруйааччыта Степан Федотов төрөөбүт Дьөттүн алааһынан сылдьыбыттара. 1992 сыллаахха Варвара Потапова дьиэтэ түмэл – дьиэ статуһун ылан Норуоттар доҕордоһуулара түмэл филиала буолбута. Ол кэмтэн билиҥҥэ диэри сылын аайы ыытыллар «Ньурба күһүнэ» бу ытык сирдэринэн барар.
Быйылгы «Ньурба уоттара» литературнай түмсүү тэриллибитэ 55 сылыгар, Варвара Потапова төрөөбүтэ 80 сылыгар ананар «Ньурба күһүнүгэр» бэлэмнэнии үлэ чэрчитинэн бэҕэһээ балаҕан ыйын 3 күнүгэр ытык сирдэрбитинэн күүстээх субботник буолла. Суруйааччы Дмитрий Пономарев-Дьолуолаах салайар «Ньурба уоттарын» чилиэннэрин көҕүлээһининэн кииннэммит бибилэтиэкэ, Норуоттар доҕордоһуулара түмэл үлэһиттэрэ, Ньурбаттан, Дьиикимдэттэн Степан Федотов сүгүрүйээччилэрэ түмсэн, сомоҕолоһон үөрэ-көтө икки сиринэн үлэ күөстүү оргуйда. Ньурба куорат дьаһалтата (баһылык Игнатьев Г.В.) Варвара Потапова түмэл дьиэтин сарайын, кини аатынан уулуссаны эримиэннээбитэ олус үөрдэр.
Сахалыы төрүт тылбыт сүппэтин туһугар санаалыын биир дьоммутун, Ньурба литературатын үйэтитиигэ анаммыт «Ньурба күһүнэ» тэрээһини сэргииргитигэр, кэлэн кыттыыны ыларгытыгар ыҥырабыт.
Ньурба, балаҕан ыйын 11 күнэ, 2026 сыл. 10:00
Ыраах Убайаан, В.Потапова түмэл дьиэтэ
- “Ньурба уоттара” 55, “Кыраһа” 35 сылларыгар аналлаах “НЬУРБА КӨМҮС КҮҺҮНҮН” аһыллыыта
- Варвара Потапова төрөөбүтэ 80 сылыгар “Ньурба уоттарын” билиҥҥи кэминээҕи бастыҥ хоһоонньута Саргылана Стручкова “Дууһам хаппахчытын арыйабын” кинигэтин сүрэхтэниитэ
Дьиикимдэ, бибилэтиэкэ 14:00
- “Дьоһун киһи дьолун үлэ үөрүүтүттэн сомсубута”. Ньурба бастакы суруйааччыта Степан Федотовка сүгүрүйүү, олохтоох бибилэтиэкэҕэ аатын иҥэрии
Дьиикимдэ, Дьөттүн алааһа
- Гаврил Монастырев -Уйусхаан “Иэйиим кыымнара” саҥа кинигэтин сүрэхтэниитэ
15:00 Киин бибилэтиэкэ тэлгэһэтэ
«СахаЛеттеринг: Этиитэ уруһуйдаа» үбүлүөйдээх суруйааччылар кынаттаах тылларын уруһуйугар күрэх
18:00 Ньурба, Олоҥхо дьиэтэ
- Билиҥҥи кэм бөлүһүөк суруйааччыта А.П.Александров -Сахса Тар 60 сааһыгар аналлаах тэрээһин
- “Көмүс күһүн” тэрээһин түмүгэ
