Күөх Ньурба сирэ-дойдута дьулуурдаах-дьаныардаах, күүстээх-уохтаах спортсменнарынан, чулуу, хоһуун бөҕөстөрүнэн аатырар, биллэр, сураҕырар.«Арассыыйа Федерациятыгар, Саха Өрөспүүбүлүкэтигэр, Ньурба оройуонугар спорт, физкультура сайдыытыгар кылаатын иһин» уонна “Киһи килбиэнэ” бэлиэлэрдээх, Саха АССР Үтүөлээх тренерэ, Саха Өрөспүүбүлүкэтин физическэй култуураҕа уонна спортка Үтүөлээх үлэһитэ, ССРС, РСФСР уонна Саха АССР спордун маастара, СӨ спордун бочуоттаах бэтэрээнэ, Ньурба оройуонун, Ньурба куоратын уонна Бордоҥ нэһилиэгин Бочуоттаах олохтооҕо Юрий Степанович Андреев өрөспүүбүлүкэ күрэхтэһиилэрин 42 төгүллээх кыайыылааҕа, ол иһигэр көҥүл тустууга 14 төгүллээх чемпион, хапсаҕайга 10 төгүллээх абсолютнай чемпион, ыччаттарга РСФСР чөмпүйүөнэ, ССРС физкультурнай үрдүк үөрэх кыһаларын Спартакиадатын 2-с призера, Москва куорат 2 төгүллээх, Бүтүн Союзтааҕы турнирдар 3 төгүллээх, Уһук Илин уонна Сибиир 5 төгүллээх, Маастардар ортолоругар ыарахан ыйааһыҥҥа Аан дойду чөмпүйүөнэ, ХХ үйэ 2 төгүллээх лауреата, тумус туттар киһибит олоҕун үйэтитэр, өбүгэбит төрүт тустууга хапсаҕай сайдыытыгар, үрдүкү таһымҥа тахсарыгар утумнаахтык үлэлиир, саха спордун историятын кэпсиир “Ньурба ньургуна, чулуу бөҕөс Юрий Андреев” кинигэ Бэс ыйын 16 күнүгэр сүрэхтэннэ.
Дьоһун кинигэ бэс ыйыгар, «Дани-Алмас” типографияҕа 195 экземплярынан бэчээттэнэн таҕыста. “Ньурба ньургуна, чулуу бөҕөс Юрий Андреев” кинигэ СӨ Ил Дархана Айсен Николаев, улууспут баһылыга Алексей Иннокентьев, улуус Сүбэтин бэрэссэдээтэлэ Сергей Евсеев, Ил Түмэн дьокутаата Владимир Прокопьев уонна Саха сирин спордун салайааччыларын киирии тылларынан саҕаланар. Үс олуктан турар кинигэҕэ Юрий Андреев төрүччүтэ, аймахтарыттан, кини кылааһынньыктарыттан саҕалаан бииргэ алтыспыт доҕотторо, спортсменнар, тренердэр ахтыылара, көбүөргэ сүрүн утарсааччыларын — дойду аатырбыт тустууктарын хаартыскалара киирбиттэр. Өссө биир кэрэхсэбиллээҕэ туспа түһүмэх быһыытынан Юрий Андреев короннай албастара Василий Николаев уруһуйдарынан уонна Александр Ильин быһаарыы суруктарынан бэриллибиттэр. Кинигэҕэ баар кьюар кодунан Юрий Андреев 1993 сылга маастардар ортолоругар Аан дойду чемпионатыгар, 1995 уонна 1997 сылларга Манчаары Оонньууларыгар туста сылдьар видеоларын көрүөххүтүн сөп.
Кинигэни Николай Тарасович Степанов аатынан фольклор-литература түмэл салайаачыта, биһиги улуус күүстээх кыраайы үөрэтээччитэ Татьяна Дмитриевна Сидорова уонна Юрий Степанович кэргэнэ, Ньурба улууһун өр сылларга салайсыбыт, билигин Саха республикатын Правительствотыгар үлэлиир Анна Михайловна Уларова бэлэмнээн оҥорон таһаардылар.
Федот Григорьевич Сафронов аатынан киин бибилэтиэкэҕэ саҥа “Ньурба ньургуна, чулуу бөҕөс Юрий Андреев” кинигэни ылан ааҕаргытыгар ыҥырабыт.
