Олоҥхо – бу биһиги өбүгэлэрбит орто дойду олоҕун туһунан дириҥ анаарыыларын, кинилэр тыйыс айылҕанан чиҥэтиллибит сыаннастарын уонна ыра санааларын, эйэлээх, уйгулаах олох түстэниитин бөлөһүөктүү көрөр тыыннаах айымньы. Олоҥхо – бу үрүйэ уутунуу ыраас, үйэлэри уҥуордаан кэлбит модун тыыннаах саха тылын төрдө-төрүтэ. Олоҥхоһут этэн-тыынан туойан бардаҕына, биһиги тылбыт ойуулуур-дьүһүннүүр күүһэ-күдэҕэ, эриэккэс эйгэтэ, эгэтэ-дэгэтэ, туойуллар толбоно араас өҥүнэн арылыйа оонньообутунан барар.

2005 сыл сэтинньи 25 күнэ биһиэхэ барыбытыгар дьоһун суолталаммыта – бу күн ЮНЕСКО Олоҥхону киһи аймах тылынан уонна өйүнэн айбыт култуурунай нэһилиэстибэтин үйэттэн үйэҕэ бэриллэр күндү баайа диэн аан дойду шедеврдэрин ахсааныгар киллэрбитэ. Бу улахан ситиһиибитин кэрэһилээн биһиги өрөспүүбүлүкэбитигэр Олоҥхо күнэ олохтоммута, ону тэҥэ сылын аайы улуустарынан Олоҥхо ыһыаҕа ыһыллар. Ньурба оройуонугар Олоҥхо ыһыаҕа 2012 сылга буолан ааспыта, онтон быйыл Сахабыт сирин саамай тымныы сиригэр Өймөкөөн оройуонугар буолар.

Бу күннэргэ, биир дойдулаахпыт Алла Сельтюкова — Айаалла айбыт “Күн сирин көмүскэлэ — үс ини-бии бухатыыр” олоҥхото кинигэ буолан таҕыста.

Россия норуоттарын култуурунай нэһилиэстибэлэрин Сылын чэрчитинэн, Саха АССР төрүттэммитэ 100 сылынан, Олоҥхо национальнай күнүгэр аналлаах Республикатааҕы Декада чэрчитинэн ийэ тыл барҕа баайын иҥэриммит олоҥхо тылын-өһүн таба суруйар үөрүйэҕи олохсутар-иҥэрэр сыаллаах «Олоҥхо дьыктаана» аахсыйа Ньурбатааҕы административнай киин үлэһиттэригэр Ньурбатааҕы киин бибилэтиэкэ үлэһиттэрэ Елена Петровна, Елена Ивановна уонна Рея Петровна иилээн-саҕалаан ыыттылар.

Дьыктааны Степан Васильев аатынан Ньурбатааҕы гимназия саха тылын учуутала Мария Николаевна аахта.

Дьыктаан түмүгүн библиотека сайтыгар, регистрацияламмыт нүөмэргитинэн таһаарыахпыт. Бары кыттааччыларга туоһу сурук туттарылынна. Туйгуннук суруйбут кыттааччыларбыт дипломунан бэлиэтэниэхтэрэ.