Ньурба дьоно-сэргэтэ улуу бөлөһүөкпүт К.Д. Уткин чинчийэн, сөргүтэн хаалларбыт кымыс иһиитин сиэрин-туомун толору тутан илдьэ сылдьар буоланнар, бу сиэр-туом ситэн-хотон, сайдан, өссө дириҥник үөрэтиллэн иһэрэ бука барыбытын үөрдэр. Бүгүҥҥү биһирэми СӨ норуодунай артыыһа Борис Иванович Борисов Алгыс түһэрэн, саҥа ыаммыт биэ үүтүн ыраастаан, арчылаан саҕалаата. Арчыламмыт биэ үүтүн салгыы хайдах астаан, охсон, ыам ыйын 22 күнүгэр диэри дөйүтэн туруорар ньыматын Арктикатааҕы култуура уонна ускуустуба үнүбүрсүтүөтүн доцена, педагогика билимин хандьыдаата Евдокия Степановна Сергина көрдөрдө. Өбүгэлэрбит саҕаттан илдьэ кэлбит ньымабытын харахпытынан көрөр, сэргиир түгэн тосхойбута олус кэрэхсэбиллээх көстүү буолла. Бу түгэн кэнниттэн чинчийэр үлэбит — кинигэбит ис тутулун, оҥоһуутун туһунан кэпсэтиигэ киирдибит.
Бу улахан үлэ туһунан кэпсэтиини Ньурбатааҕы К.Д. Уткин аатынан норуоттар доҕордоһууларын түмэлин дириэктэрэ Анна Андреевна Туманова иилээн ыытта. Аан тылы бырайыак ааптара, Ньурба оройуонун култуураҕа уонна ыччат бэлиитикэтигэр департаменын салайааччыта Розалия Михайловна Тихонова этэн, кэпсэтии аанын аста. Салгыы монография туһунан Евдокия Степановна Сергина бэйэтэ, хас да сыл устата Ньурба ыһыахтарын кымыһын асчыта, Ньурбатааҕы судаарыстыбаннай драматическай тыйаатыр дириэктэрэ Анна Витальевна Багмет билиһиннэрдилэр.
Чинчийэр үлэ сүрэхтэниитинэн Ньурба оройуонун депутаттарын сэбиэтин бэрэссэдээтэлэ Нюргуяна Михайловна Михайлова, Ньурба оройуонун баһылыгын социальнай боппуруостарга солбуйааччыта Наталья Семеновна Петрова, Ньурба оройуонун тыа хаһаайыстыбатын департаменын салайааччыта Леонид Владимирович Ушканов, С.А. Новгородов аатынан «Айар» национальнай кинигэ кыһатын салайааччыта Август Васильевич Егоров, С.А. Новгородов аатынан «Айар» национальнай кинигэ кыһатын салайааччытын солбуйааччы Валерий Николаевич Луковцев, Ньурба оройуонун Ньурба оройуонун ытык олохтооҕо Владимир Антонович Никифоров, Ньурбачаан нэһилиэгиттэн «Түмсүү» норуот айымньытын дьиэтин кэлэктиибэ, салайааччы Татьяна Семеновна Саввинова эҕэрдэ тылларын эттилэр.
Дьоллоох дьоро түһүлгэбит кэрэһиттэригэр истиҥник махтанабыт! Үрүҥ илгэ үрүлүйэ уһуннун, кыынньар кымыс үйэлэргэ аатырдын!
Ньурба оройуонун култуураҕа уонна ыччат бэлиитикэтигэр департамена
