«УТУМ. СИТИМ. КЭСКИЛ» Пуорум чэрчитинэн «Оһуокай мин дьылҕабар» төгүрүк остуол биир санаалаахтары, саха төрүт үҥкүүтүн оһуокайы сэргээччилэри, оһуокайы таптааччылары муста. Киэҥ Ньурба сирэ-дойдута былыргыттан ааттаах-суоллаах оһуокайдьыттардааҕынан биллэр. Онон, бүгүҥҥү көрсүһүү сүҥкэн суолталаах тэрээһин буолла.
Төгүрүк остуолу Ньурбатааҕы К.Д. Уткин аатынан норуоттар доҕордоһууларын түмэлин дириэктэрэ А.А. Туманова салайан ыытта. Аан тылы Ньурба оройуонун култуураҕа уонна ыччат бэлиитикэтигэр департаменын салайааччыта, СӨ Аар Дархан этээччитэ Р.М. Тихонова эттэ.
Кэпсэтиини ыраахтан ыалдьыттарбыт Арктикатааҕы судаарыстыбаннай ускуустуба, култуура уонна креативнай индустрия университетыттан ректор, Россия үрдүк үөрэхтээһинин үтүөлээх үлэһитэ, Саха Өрөспүүбүлүкэтин култууратын үтүөлээх үлэһитэ, педагогика билимин хандьыдаата, профессор С.С. Игнатьева, культурология уонна култуура нэһилиэстибэтин кафедратын профессора, социология билимин дуоктара, психология билимин хандьыдаата, циркумполярнай цивилизация билим-чинчийэр киинин салайааччыта У.А. Винокурова, ону тэҥэ, ытык киһибит, СӨ норуотун маастара, СӨ Дархан Ууһа В.И.Саввинов сүрүннэстилэр.
Төгүрүк остуолу сэргээн-сэҥээрэн, кэнчээри ыччат кэлбитэ үөрдэр, ол курдук, оройуоммут эдэр уһуйааччылара, оһуокайдьыттара, тойуксуттара уһуйуллааччыларын кытары кэлэн кыттыбыттарын бэлиэтиибит. Киэҥ Ньурба оһуордаах оһуокайа инникилээх, кэскиллээх, сайыннарар ыччаттаах, үйэтитэр үтүктээччилэрдээх, умсугуйан дьарыктанар уһуйуллааччылардаах диэн түмүк санаа үөскүүр.
Ньурба оройуонун култуураҕа уонна ыччат бэлиитикэтигэр департамена
