Бу күннэргэ Ньурбатааҕы кииннэммит бибилэтиэкэ (дир. А.В. Багмет) иһинэн үлэлиир «Ньурба уоттара» түмсүү үлэтин сүрүннүүр актив кэлэр сылга үлэтин торумнуур сүбэ мунньаҕа буолла.
Түмсүү салайааччыта суруйааччы Д.Н.Пономарев-Дьолуолаах 2026 сыл бэлиэ түгэннэрин, үбүлүөйдээх суруйааччыларын туһунан иһитиннэрииттэн мунньаҕын саҕалаата. Ньурба оройуонун култуураҕа уонна ыччат политикатыгар салайааччы Р.М. Тихонова, бибилэтиэкэ ситимин дириэктэрин солбуйааччы Е.А. Саввинова кыттыыны ылан, бэйэлэрин санааларын үллэстибиттэрэ түмсүү инники үлэтэ ситиһиилээх, элбэх кыайыылардаах буоларыгар эрэли саҕар. Хаһан да, ханна да салалта өттүттэн өйөбүллээх буоллаҕына общественнай түмсүү үлэлиир, кыаҕырар, сайдар.
Үүнэр 2026 сыл «Ньурба уоттарыгар» өрөгөй түгэннэринэн баай сыл. «Ньурба уоттара» тэриллибитэ 55, түмсүү күүстээх салаата Антоновкатааҕы «Кыраһа» 35 сыллара. Маны сэргэ саха литературатыгар биллэр көстөр суруйааччыларбыт Варвара Потапова, Прокопий Чуукаар, Василий Нехоруков — Дылбаны, Иннокентий Дмитриев-Сиэн Чолбодук, Ахмед Дмитриев, Май Емельянов, Александр Александров -Сахса Тар, 1971 сылтан «Ньурба уоттарын» бастакы хардыыларын сүрүннэспит суруналыыс Ф.Г.Петрова, «Коммунизм суола» хаһыат редактора (түмсүүнү Ньукулай Чуор редакция иһинэн тэрийбитэ) С.П. Гаврильев, Чаппандатааҕы литература музейын төрүттээбит Н.Т.Степанов үбүлүөйдээх сыллара. Маннык баай түгэннэрдээх 2026 сылы билиҥҥи «Ньурба уоттара» сүргэлэрэ көтөҕүллэн, элбэх былааннаах, торумнаах көрсөргө үлэлииллэр.
2025 сылы түмүктүүр үтүө сонуннартан биирдэстэрэ сэтинньи 8 күнүгэр Дьокуускай куоракка СМАРТ бибилэтиэкэҕэ Саргылана Стручкова «Дууһам хаппахчытын арыйабын» саҥа кинигэтин сүрэхтэниитэ буолар. Саргылана Анатольевна «Ньурба уоттарын» өссө биир күүстээх салаатын Маалыкайдааҕы «Аартык» (сал. Аммосова В.П.) чилиэнэ. 2024 сыл «Тобуруокап күһүнүгэр» хоһоон айыытын күрэҕэр кыттан Муҥутуур кыайыылаах аатын ылан «Офсет» кинигэ кыһатыгар 100 ахсаанынан тус кинигэтин бэчээттэтэргэ көҥүл ылбыта. Ол кыайыы түмүгэ саха литературатыгар күүстээх, көҥүл санаалаах Ньурбаттан өссө биир дьахтар поэт киириитин туоһута.Хайа да кэмҥэ сири-дойдуну айар дьоҕурдаах дьоно-сэргэтэ ырааҕынан — чугаһынан аатырдаллар, билиһиннэрэллэр. Тапталлаах Ньурбабытын дойду устун дорҕоонноохтук иһитиннэрэр «Ньурба уоттарын» бары айар дьонугар ситиһиилэри, кыайыылары, саҥаттан саҥа айымньылары!
Киин бибилэтиэкэ кыраайы үөрэтэр салаатын бибилэтиэкэрэ Маргарита Ноева
