2022 с. кулун тутар 2 күнүгэр Ф. Г. Сафронов аатынан Киин библиотекаҕа «Ньурба уоттарын» аҕа саастаахтарын уонна эдэрдэрин түмсүүлэрин актыыптарын холбоһуктаах мунньахтара буолла.
Мунньах түмсүүгэ саҥа киирбит СӨ суруйааччыларын сойууһун чилиэнэ Александров Александр Петрович уонна Күндээдэттэн эдэр талаан Саввинова Евгения Игоревна бэйэлэрин билиһиннэриилэриттэн саҕаланна.
Бу кэннэ быйылгы дьылга ханнык айымньылар бэчээккэ бэлэм сыталларын чопчулааһын буолла. Ол түмүгүнэн:
1.Сельтюкова А. Р. (Айаалла) — хоһооннорун хомуурунньуга.
2.Григорьев П. Ф. — Салҕааһын «Хотун Бүлүү хонноҕуттан» иккис кинигэтэ.
3.»Чымыдаан кистэлэҥ суруктара» — суруйааччы Степан Федотов архыыбыттан көстүбүт суруйууларын хомуурунньуга, бэлэмнээтэ Канаева Л. А.
4.Степанов Ст. А. хоһооннорун хомуурунньуга (Дьиикимдэ).
5.«Ньурба уоттарын» эдэр састаабын хомуурунньуга.
Бу кинигэлэр тахсалларыгар улуустан үбүлээһини көрдөһөргө диэн уураах ылынныбыт.
Үһүс түһүмэххэ нэһилиэктэри кытта үлэ ырытылынна. Бу күҥҥэ Малдьаҕарга, Чаппандаҕа, Чуукаарга, Өҥөлдьөҕө, Дьаархаҥҥа, Аканаҕа, Хаҥаласка айар куттаахтар түмсүүлэрэ бу кыстыкка киирэн баран тэриллибиттэрэ биһирэннэ. Киин бибилэтиэкэттэн Васильева Рея Петровна — Марха, Ноева Маргарита Романовна — Маалыкай, Павлова Ирина Ивановна -Ньурба куусталарын куратордарынан быйылгыттан үлэлэрин саҕалаатылар.
Антоновкаҕа үлэлии олорбут «Кыраһа» түмсүү саҥалыы тыыннанан үлэтин саҕалаан эрэрэ биир үтүө сонун быһыытынан бэлиэтэннэ, манна салайааччынан Софронова Елена Ивановна үлэлээн эрэрэ киһини үөрдэр, эрэли үөскэтэр, өссө “Ньурба уоттарыттан” көмөлөһөөччүнэн, куратор быһыытынан Александров А. П. — Сахса Тар ананна.
Группалар үлэлэрин туһунан салайааччылар Моисей Черепанов, Дмитрий Пономарёв иһитиннэрии оҥордулар.
Кураторбыт Кириллова Юлия Августовна кэлэр үлэлэр былааннарын сүрүннээтэ, култуура Департаменыгар биллэрии оҥоруох буолла.
Мунньахха эдэрдэр санааларын эппиттэрэ сэргэхситтэ, сөптөөх хайысханы тута сылдьарбытыгар итэҕэттэ.
Айар үлэҕэ саҥа үктэнэн эрэр ыччаттарбытын Киин бибилэтиэкэ үлэһиттэрэ Национальнай бибилэтиэкэ электроннай бибилэтиэкэтигэр ааҕааччы быһыытынан регистрациялаатылар.
Дмитрий Пономарев,
“Ньурба уоттарын” түмсүү салайааччыта,
СӨ суруйааччыларын сойууһун чилиэнэ.
