Кулун тутар 26 к. улууспутугар оҕо төрөөбүт тылынан ааҕыытын сайыннарарга туһуламмыт бэлиэ түгэн буолла. Улуустааҕы кииннэммит бибилэтиэкэ ситимигэр «Оҕолорго төрөөбүт тылынан ааҕыыны тарҕатар киин» үөрүүлээхтик арылынна.
Тэрээһиҥҥэ «Айар» национальнай кинигэ кыһатын салайааччыта Август Егоров салайааччылаах кинигэ кыһатын бөлөҕө, улуус баһылыгын социальнай боппуруостарга солбуйааччыта Наталия Петрова, култуура уонна ыччат бэлиитикэтин департаменын салайааччыта Розалия Тихонова, СӨ идэлээх сойуустарын Федерациятын бэрэссэдээтэлэ Николай Дегтярев, улуустааҕы үөрэх салалтатын салайааччытын солбуйааччыта Сергей Васильев, уопсастыбаннас бэрэстэбиитэллэрэ, оскуола үөрэнээччилэрэ кыттан, биһиэхэ күндү ыалдьыт буоллулар.
«Ньурба-Огни Нюрбы» хаһыат кылаабынай эрэдээктэрэ, бибилэтиэкэ күндү доҕоро Лена Петрова оҕо аймах биһирэбилин ылбыт комикстарын туһунан билиһиннэрдэ. 2025 с. түмүгүнэн «Айар» кинигэ кыһатыгар тахсыбыт айымньыларга «Аан Дархан кинигэ» аатын ылбыт «Ньырбакаан» кинигэ ааптара Дмитрий Пономарев аата киэн туттуулаахтык ааттанна. Оҕо бибилэтиэкэтин үлэһитэ Октябрина Григорьева Ньырбакаан дойдутугар төннүүтүн монологун иэйиилээхтик толордо.
Оҕо бибилиэтиэкэтин бастыҥ ааҕааччылара Афанасьева Айсаара (Ньурба 3 №-дээх оскуолатын 3 «б» кылааһа) уонна Айсиэн Михайлов (Ньурбатааҕы техлицей 5 «б» кылааһа) өрөгөйдөөх быһыыга-майгыга кунуопканы баттаан, «Оҕолорго төрөөбүт тылынан ааҕыыны тарҕатар киини» үөрүүлээхтик астылар.
Мустубут дьону бэлиэ түгэнинэн истиҥник эҕэрдэлээн, СӨ Ил Түмэн Бэрэссэдээтэлин 1-кы солбуйааччыта Александр Жирков истиҥ тыллардаах эҕэрдэ суруга ааҕылынна. Култуура уонна духуобунай сайдыы миниистирэ Афанасий Ноев видеонан эҕэрдэтэ көрдөрүлүннэ. Үгүс эҕэрдэ тыл этилиннэ. Оҕолорго ааҕыыны тарҕатар киин эдэр ааҕааччыларга элбэхтэ сөбүлээн сылдьар, үгүс интэриэһинэй дьоннуун көрсөр миэстэлэрэ буоларыгар баҕаран, алгыс үтүөтэ ананна. Улуус баһылыгын солбуйааччыта Наталия Петрова В.Егоров «Таас тиит» оҕону сиэргэ-туомҥа үөрэтэр икки тылынан тахсыбыт кинигэтинэн бибилэтиэкэлэргэ стартап бырайыагы саҕалаан тарҕатарга сүбэлээтэ. Култуура уонна ыччат бэлиитикэтин департаменын салайааччыта Розалия Тихонова бибилитиэкэ бастыҥ үлэһиттэригэр махтал суруктары туттарда.
Улуустааҕы кииннэммит бибилэтиэкэ ситимин дириэктэрэ Юлия Васильева санаатын үллэстэр:
«2025 с. ахсынньыга Дьокуускайга бибилэтиэкэрдэр бастакы сийиэстэрэ буолбута. СӨ Ил Дархана Айсен Николаев уонна СӨ Бырабыыталыстыбатын Бэрэссэдээтэлин бастакы солбуйааччыта Сергей Местников өрөспүүбүлүкэ хас биирдии бибилэтиэкэтигэр саха тылынан оҕолор ааҕыылара намтаабытын, төрөөбүт тылынан ааҕыыны тарҕатар кииннэр аһыллыахтаахтарын туһунан эппиттэрэ. Ол аата өрөспүүбүлүкэҕэ олорор норуоттар литератураларын сөргүтүү, харыстааһын инники күөҥҥэ тутуллуохтаах. Биһиги төрөөбүт сахабыт тылын талан, бу хайысханан үлэлии сылдьабыт.
Статистика көрдөрөрүнэн, сыллата сахалыы ааҕар оҕо ахсаана аҕыйаан иһэр. Маннык баран истэҕинэ аҕыйах уон сылынан сахалыы саҥарар дьон ахсаана лаппа аччыан сөбүн туһунан билгэлииллэр. Маннык дьиксиннэриилээх быһыы-майгы тахсыбатын туһугар, биһиги үлэбит биир сүрүн соругунан төрөбүт тылбытын харыстааһын, тарҕатыы буолар. Ол иһин элбэх бэлэмнэнии үлэтин ыытан, «Оҕо ааҕыытын тарҕатар киини» арыйдыбыт. Элбэх ыҥырыылаах ыалдьыттар, бииргэ үлэлэһэр тэрилтэлэрбит, ол иһигэр «Айар» национальнай кинигэ кыһатын салайааччылара, суруйааччылар кэлбиттэрэ үөрдэр. Хас биирдии филиалбытыгар эмиэ бу бырагырааманан маннык Кииннэри арыйыахтаахпыт».
Улуустааҕы кииннэммит бибилэтиэкэ ситимигэр «Оҕолорго төрөөбүт тылынан ааҕыыны тарҕатар киин» аһыллыытын кытта тэҥҥэ, «Айар» национальнай кинигэ кыһата тэриллибитэ 100 сылыгар аналлаах кинигэ быыстапката туруорулунна. Ааҕааччыларга табыгастаах буоллун диэн, Ньурба сирин-уотун, нэһилиэктэрин, биллиилээх, туруу үлэһит дьонун, бастыҥ тэрээһиннэрин туһунан уонна айар куттаахтарын айымньыларын кинигэлэрин тиэмэнэн араарылынна. «Айар» кинигэ кыһатыгар маннык элбэх кинигэ арааһа бэчээттэнэн тахсыбытын дьон биһирии көрдүлэр. Бибилэтиэкэ волонтердара, чугас доҕотторбут Дыдырысова Сайыына, Ушканова Милана, Колодезникова Сайаана уонна Столяров Артур быыстапка туһунан сиһилии билиһиннэрдилэр.
Тэрээһиммитигэр кэлэн кыттыбыт, үөрүүбүтүн үллэстибит, күүс-көмө буолбут дьоммутугар-сэргэбитигэр, ыалдьыттарбытыгар дириҥ махталбытын тиэрдэбит! «Оҕолорго төрөөбүт тылынан ааҕыыны тарҕатар киин» аана мэлдьи аһаҕас, эдэр ааҕааччыларбытын күннэтэ күүтэбит!
Ньурбатааҕы оҕо бибилэтиэкэтэ.
