Ф. Г. Сафронов аатынан киин бибилэтиэкэ уонна оройуоннааҕы бэтэрээннэр сэбиэттэрин көҕүлээһиннэринэн «Оҕуруоту көрүү кистэлэҥнэрэ» диэн маастар кылааһы Ньурба улууһун, Антоновка бөһүөлэгин олохтооҕо Агафья Афанасьевна олус сэргэхтик ыытта. Агафья Тарасова республикаҕа биллэр оҕуруотчут, мэлдьи бэйэтин опытын тарҕатааччы, улахан дьиэ кэргэн ийэтэ, эбээтэ. Идэтинэн эргиэн үлэһитэ,бу эйгэҕэ 40-тан тахса сыл үлэлээбитэ. 1982 сылтан оҕуруотунан дьарыктанар. Үгүс сыллар усталарыгар дьиэ кэргэнин бэйэтэ үүннэрбит аһынан күндүлүүр, сибиэһэй аһынан хааччыйар. Агафья үүнээйи олордуу кистэлэҥнэрин, ханнык суортары үүннэриэххэ сөбүн мустубут үүнээйини сэҥээрээччилэргэ элбэх сүбэни биэрдэ. Библиотека үлэһитэ ыалдьыттары Георглана Николаева роза уонна василек сибэкки сэбирдэхтэриттэн оҥоһуллубут минньигэс чэйинэн күндүлээтэ. Рея Васильева «венские вафли» буһаран амсатта. Ааҕааччыларбыт, ыалдьыттарбыт истиҥник сэһэргэһэн, элбэх сүбэ-соргу ылан, түмүккэ Агафья Афанасьевна бэйэтин үүннэрбит үүнээйитин сиэмэлэрин атыылаһан, астынан тарҕастылар.

Рея Васильева.