Бүгүн муус устар 8 күнүгэр Оҕо кинигэтин нэдиэлэтин чэрчитинэн Өрөспүүбүлүкэҕэ култуура сылыгар анаан «Оһуор ойуу» диэн ааттаах маастар-кылаас ыытылынна. Бу тэрээһини Ньурбатааҕы ускуустуба оскуолатын ойуулуур-дьүһүннүүр салаа учуутала Ильина Варвара Михайловна иилээн-саҕалааан Өрөспүүбүлүкэтээҕи “Рисуем все” бырайыак иһинэн оҕолору кэрэҕэ уһуйар дьикти алыптаах дьарыгы ыытта.
Куорат оскуолаларыттан 4-5 кылааска үөрэнэр оҕолор мустан, бииргэ үлэлээн, бэйэ-бэйэлэригэр көмөлөһөн акрил кыраасканан сахалыы оһуордаах чаппараах ойуулаатылар. Онуоха киистэ көмөтө суох, аҥаардас хортуонунан уонна фоамиранынан бэйэ оҥоһуу штамнары туһанан, саҥа техниканы боруобалаатылар. Бу үлэ көрүҥэ бэрт ураты буолан үгүс болҕомтону, кичэллээх буолууну ирдээтэ. Оҕолор ыксала суох олорон эрэ, өйдөрүгэр ойуулаан көрбүт оһуордарын бэркэ кыһаллан түһэрдилэр. Барыларын үлэтэ эриэккэс буолан истэ.
Бүгүҥҥү тэрээһиммит олус истиҥник, чуумпутук ааста, бары уруһуйдуурунан үлүһүйэн бириэмэ ааспытын билбэккэ да хааллылар. Олус үчүгэй маастар-кылааһы ыыппыт бибилэтиэкэбит күндү доҕоругар Варвара Михайловнаҕа махталбытын биллэрэрбит! Өрүү сырдыгынан сыдьаайа, тулаҕын киэргэтэ, тупсара сылдьарыҥ барыбытыгар холобур буолар, үлэҕэр үрдүктэн-үрдүк ситиһиилэри, тус олоххор дьолу баҕарабыт!
 
Оҕо уонна ыччат бибилэтиэкэтин сэбиэдиссэйэ Ушканова Я.В.