Сэтинньи ый 30 күнүгэр, Хаҥалас нэһилиэгэр Өрөспүүбүлүкэ үрдүнэн ыытылла турар Олоҥхо декадатын чэрчитинэн «Харбаанча Хоһуун бухатыыр» олоҥхо туруоруллан, көрөөччүлэр киэҥ биһирэбиллэрин ылла. Олоҥхо ааптара Үөһээ Бүлүү улууһун Хоро нэһилиэгин култуура киинин методиһа, эдэр талааннаах үлэһит Хаарчаана Семенова буолар. Бу саҥа испэктээк премьератын С. П. Гаврильев аатынан «Тойук» НАДьиэтин уус уран салайааччыта Венера Винокурова уонна ыччат испэсэлииһэ Марфа Осипова сыыппара үйэтин көмөтүнэн, аныгылыы таҥан туруордулар.

Олоҥхо оруолларын:

• Улуу Хаҥалас оҕонньору — Иван Федоров;
• Талба Аат Хотуну — Анжелика Васильева;
• кинилэр уоллара Харбаанча Хоһуун Бухатыыры — олохтоох дьаһалта баһылыгын солбуйааччыта Семен Семенов;
• Күн кыыһын — Марфа Осипова;
• Айыыһыты — Клара Герасимова;
• Абааһы уолун — Игорь Антонов;
• Абааһы кыргыттарын — Венера Винокурова, Клара Герасимова;
• Симэхсин эмээхсини — Сардаана Николаева оонньоон көрөөччүлэр куттарын тутан, табыллан толордулар.

Олоҥхо ис хоһоонун Екатерина Степанова, Арылхан Семенов, Лилия Самсонова чаҕылхайдык кэпсээн тириэртилэр.
Олоҥхоҕо эрэкэ -дьэрэкэ оҕолору, олоҥхо омуннаах оҕолорун «Туллукчаан»үҥкүү бөлөҕө (сал. Милена Иванова), үҥкүүһүттэри эдэр ыччат толоруута олоҥхо туруоруутун сэргэхситтэ. Манна эбэн эттэххэ ,сүрүн оруолу -Т алба Аат Хотуну толорбут библиотека үлэһитэ Анжелика Васильева алта уолун кытыннаран, ол иһигэр 1,5 саастаах кырачаан Эрсан кыттыыны ылбытын биһириэххэ эрэ сөп.
Олонхону Христофор Терентьев, Геннадий Винокуров уотунан, тыаһынан киэргэттилэр. Олоҥхо бүппүтүн кэнниттэн ыалдьыппыт Хаарчаана Семенова оһуокай тылын этэн, Үөһээ Бүлүүлүү эрчимнээх оһуокайын олохтоохтор оройуттан туттулар.
Түгэнинэн туһанан култуура үлэһиттэрэ, Ньурба оройуонун култууратын департаменыгар, чуолаан салайааччы Р. М. Тихоноваҕа олоҥхо таҥаһын — сабын, туттар тэриллэри уларсан көмө буолбуттарыгар махталларын тиэрдэллэр, эбэн эттэххэ үөрэҕирии уонна култуура бырайыак олоххо киирэн, бииргэ үлэлээһин үчүгэй түмүгү биэрэрин эмиэ сыаналыахха сөп.
Хаҥалас сирэ былыр былыргыттан тойуксуттар, олоҥхоһуттар олохсуйбут түөлбэлэринэн биллэр, онон олоҥхону саҥалыы тыыннаан сөргүппүт, ыччат дьоммутугар, саха буоларбытынан киэн тутта, норуоппут духуобунай нэһилиэстибэтигэр кыттыһан, ытык айымньыбыт Олоҥхо эйгэтигэр киирэн айаннаспыт көрөөччүлэрбитигэр махтана хаалабыт.

Мария Николаева. Хаҥалас