Олунньу ый 6 күнүгэр Мэҥэдьэктээҕи библиотекаҕа доруобуйаларынан хааччахтаах дьоҥҥо, инбэлиит оҕолордоох төрөппүттэргэ, инбэлиит дьону көрөн олорор дьоҥҥо аналлаах сырдатар-иһитиннэрэр төгүрүк остуол буолла. Биһиги нэһилиэкпитигэр уопсайа 43 (ол иһигэр 5 оҕо) доруобуйаларынан хааччахтаах дьон олороллор.
Төгүрүк остуолга кыттыыны ыллылар Ньурба оройуонун социальнай харалтатын сүрүннүүр үлэһитэ Андреева Лариса Прокопьевна, Мэҥэдьэк нэһилиэгин социальнай үлэһитэ Николаев И. В. уонна доруобуйаларынан хааччахтаах дьон. Лариса Прокопьевна Ньурбаттан быһа сибээскэ тахсан, инбэлииттэргэ ханнык чэпчэтиилэр, көмөлөр, реабилитация туһунан, босхо эмп, санаторийдар баалларын иһитиннэрдэ. Кэлбит дьон араас ыйытыктары биэрэн, интэриэһиргиир боппуруостарыгар харда ыллылар. Дьону долгутар боппуруостарынан буоллулар: босхо эмп, сытар дьоҥҥо памперсынан хааччыллыы мөлтөҕүн, Маалыкай балыыһатыгар, Ньурбаҕа невролог быраас суоҕун, группаны уларытыы ыраах олорор дьоҥҥо ыарахаттардааҕын эттилэр. Тустаах дьоҥҥо туһалаах буоллун диэн ыытыллыбыт төгүүрүк остуолбутугар уопсайа 16 киһи кыттыыны ылла, тугу эмит саҥаны, сонуну истибиттэрэ, билбиттэрэ буолуо диэн эрэнэбит.

Матрена Габышева, Мэҥэдьэк.