XXIV кыһыҥҥы Олимпийскай оонньуулар олунньу ый 4 — 20 күннэригэр Китай Пекин столицатыгар ыытыллар. Барыллаан ааҕыынан 4000-ҕа тиийэр спортсмен спорт 15 көрүҥэр киирсиэхтэрэ, 109 комплект медаль оонньонуо.
Олимпиада талисмана Бин Дунь Дунь панда уонна Сюэ Жун Жун диэн китайскай фонарь.
Олимпиада историята: Олимпийскай оонньуулар төрүтэммит сирдэрэ — Древняй Греция, Олимпия куорат, киниттэн бу оонньуулар ааттара үөскээтэҕэ. Историяҕа этиллэринэн таҥаралар, ыраахтааҕылар, дойду салайааччылара төрүттээбит олимпийскай оонньуулара Зевс таҥара чиэһигэр 776 с. биһиги эрабыт иннинэ ыытыллыбыт. 4 сыл арыттаах ыытыллар Олимпиада сылыгар гонцы диэн ааттаммыт сонуну тарҕатар сүүрүктэр дьону ыҥыран, Греция колонияларыгар оонньуу ыытыллар кэмин тарҕаталлара. Ол түмүгэр атлеттар (спортсменнар) Олимпияҕа Балканскай полуостров бары муннугуттан мусталлара.
XXIV кыһыҥҥы Олимпийскай оонньууларга Саха сириттэн төрүттээх хоккеист Андрей Кузьменко олимпиадаҕа кыттыаҕа. Андрей Дьокуускайга төрөөбүт. Аҕата хоккей тренера, ийэтэ эмиэ спортсменка. Уол кыра сааһыттан хоккейы сөбүлээбит, 5 сааһыгар Москваҕа көһөн олохсуйбуттар. Билигин Андрей Кузьменко Санкт-Петербург СКА хамаандатыгар оонньуур. Олунньу 9 күнүгэр Россия хамаандата бастакы киирсиигэ Швейцарияны кытта оонньуур. Быһа эфир олохтоох бириэмэнэн 17.40 мүн саҕаланар.
Россия хамаандатыгар ситиһиилэри!🎉🥇🏆

М. Николаева, библиотекарь.