Прокопий Яковлевич Прокопьев — Чуукаар — XX үйэ иккис аҥаарыгар саха литературатыгар, журналистикатыгар уонна общественнай олоҕор биллэр-көстөр суолу-ииһи хаалларбыт киһи. Кини аата саха дьонугар суруйааччы, тылбаасчыт, журналист, кыраайы үөрэтээччи уонна учуутал быһыытынан биллэр.

Прокопий Чуукаар 1941 сыллаахха Аҕа дойду Улуу сэриитэ саҕаламмыт сылыгар күн сирин көрбүтэ. Аҕата эрдэ өлөн, ийэтэ алта оҕолоох хаалан, кыра эрдэҕиттэн үлэҕэ-хамнаска эриллэн улааппыта. Оскуола кэнниттэн Бүлүүтээҕи педагогическай училищеҕа үөрэммитэ. Салгыы Москваҕа Литературнай институкка үрдүк үөрэҕи баһылаабыта.

Прокопий Чуукаар сахалыы тылынан хас да кинигэни суруйбута. Кини айымньыларыгар төрөөбүт дойдутун, дьонун-сэргэтин, сэрии кэннинээҕи ыарахан кэмнэр уонна олоххо дьулуур туһунан кырдьыктаахтык суруйар.

Иван Гоголев «Хара кыталык» диэн улахан романын редактордаабыта.

«Эдэр коммунист», «Сахаада», «Киин куорат» курдук хаһыаттарга айымньылаахтык үлэлээбитэ, элбэх ыстатыйалары, очеркалары суруйбута.

Саха сирин чулуу дьоннорун, үлэ, сэрии дьоруойдарын, араас идэлээх дьон туһунан матырыйааллары хомуйан, сырдатан хаалларбыта. Дойдутун историятын, дьонун-сэргэтин туһунан «Олоҕум олуктара» диэн ахтыы-сэһэн кинигэлээх.

Прокопий Чуукаар биир биллэр айымньыта — «Өлүү-тиллии икки ардынан» диэн кинигэтэ.

Доҕотторо ахталларынан, истиҥ-иһирэх сыһыаннаах, элбэх кэпсээннээх, сымнаҕас майгылаах киһи эбит. Дойдутугар мэлдьи сибээһин быспакка, көмөлөһө, билсэ-көрсө сылдьара. Табаарыстарыгар, дойдутун дьонугар истиҥник сыһыаннаһарын иһин махталлаахтар.

Кини 2026 сыллаахха 85 сааһын томточчу туолар үбүлүөйдээх сылын биир дойдулаахтара киэҥник бэлиэтиэхтээхтэр. Прокопий Чуукаар — саха норуотун култууратын, литературатын сайдыытыгар бэйэтин кылаатын киллэрбит ытык киһи