Алтынньы 16 күнүгэр, Саха Өрөспүүбүлүкэтин Национальнай библиотекатын “Ааптар оҕолор” бырайыагынан тахсыбыт “ХОҺООНУНАН КҮН-ДЬЫЛ БИЛГЭТЭ” Валерий Иннокентьев билгэлээх хоһоонноругар Ньурбатааҕы оҕо ускуустуба оскуолатын художественнай 5-с кылааһын үөрэнээччилэрин уруһуйдара (салайааччы Ильина Зинаида Егоровна), фольклорнай 4-с кылаас оҕолорун ааҕыылара (салайааччы Семенова Айна Николаевна) киирбит электроннай кинигэтин сүрэхтэниитэ буолан ааста!
Саха Өрөспүүбүлүкэтин национальнай библиотекатын “Ааптар-оҕолор” серията 2021 сылга олохтоммута. Сүрүннээччи — Сивцева Татьяна Николаевна, оҕо цифровой ресурсатын салаатын сүрүн библиотекара буолар.
Ньурба улууһа “Ааптар-оҕолор” бырайыагы кытта ыкса 2023 сылтан үлэлээн саҕалаабыта.
2023 сылга:
- Тимофей Сметанин “Күөрэгэй” айымньытын иллюстрацията (салайааччы Ильина З.Е.)
2024 сылга:
- “Танец красок” Вика Шадрина. (салайааччы Михайлова М.А.)
“Сказки Арктики и Севера» диэн хомуурунньукка Харланова Элеонора.
«невероятная история Кындыкаан” үлэтэ киирбитэ.
- “Өҥнөөх сабынан буукуба эйгэтэ” : Ньурбатаа5ы о5о ускуустубатын оскуолатын 3 кылааһын үөрэнээччилэрин үлэлэрэ. (салайааччы Егорова А.В.)
2025 сыл:
- “Үүт көрдүүр тугутчаан” Саввинова Анна Маалыкай.
“Чудесный мир красок”: творческая работа капустиной александры салайааччы Ильина З.Е.
- “Хоһоонунан күн -дьыл билгэтэ” Валерий Иннокентьев билгэлээх хоһоонноругар Ньурбатааҕы оҕо ускуустуба оскуолатын художественнай 5-с кылааһын үөрэнээччилэрин уруһуйдара, фольклорнай 4-с кылаас оҕолорун ааҕыылара.
Электроннай кинигэҕэ оҕолор бэйэлэрин уруһуйдара, айымньылара киирэн кинигэни байыталлар.
Бырайыак үлэтин оскуолаҕа киириэн иннинээҕи саастаах оҕолорго уонна алын кылаас оҕолоругар төрөөбүт тылы үөрэтэргэ, таба саҥарыыга, билиэн-көрүөн баҕалаахтарга олус табыгастаах диэн сыаналаан туран иитээччилэргэ, учууталларга эбии көмө матырыйаал курдук туттуллуон сөп, методическай пособие быһыытынан тарҕаныан сөп.
Инникитин бу бырайыагы кытта ыкса үлэбитин салҕыахпыт.
Валерий Иннокентьев туһунан Саха Өрөспүүбүлүкэтин култууратын Үтүөлээх үлэһитин Тимофеев С.С. ахтыытыттан.
Олох – айан,
Уостубат уйулҕан айан.
Ол аата, хаамсыахха –
Ыраата устуохха,
Үрдүккэ көтүөххэ. (Олох. Валерий Иннокентьев)
«Уолаттарым барахсаттар.
Библиотекаҕа үлэлээбит 22 сылым тухары аҕыйах ахсааннаах эр дьону кытта үлэлээбитим. Библиотекаларга былыргыттан быйылгыга дылы сүнньүнэн кэрэ аҥаардар үлэлииллэр. Арай биһиги Ньурбаьыт оройуонугар 80-с, 90-с сыллпарга балачча элбэх ахсааннаах эр дьон үлэлии сылдьыбыппыт. Ол курдук бырааттыы Ларионовтар – Иван уонна Александр, Костя Марков, Александр Максимов, Валерий Иннокентьев (худуоһунньуктар, тус-туһунан кэмнэргэ) үлэлээбиттэрэ.
Уруһуйдьут, талааннаах поэт, ылбаҕай ырыаһыт Валерий Иннокентьев оройуоҥҥа киэҥник биллэр киһи этэ. Кини оройуон киин библиотекатыгар худуоһунньугунан үлэлиир кэмнэрэ — кини талааннара саамай арыллыбыт кэмнэрэ быһыылаах этэ диэхпин баҕарабын. Валерий оройуон общественнай олоҕор көхтөөхтүк кыттар, айар киһи быһыытынан чараас дууһалаах, тугу барытын бэйэтин дууһатын нөҥүө аһарар эбит. Сүрдээх өрүкүнэс, үөрүнньэҥ, дьоҥҥо кур үтүө санаалаах, сороҕор кыраттан даҕаны аһара күүскэ хомойор, хоргутар идэлээх этэ.
Читальнай зал түгэҕэр кып-кыра үлэлиир хостоох этэ. Котельнайбыт эргэ библиотекаҕа сыста турар этэ, котельнай сыта киирэригэр наадыйбакка үлэлиир этэ. Детскай библиотека коридорын устатыгар саха литературатын төрүттээчилэрин портреттарын, утары өттүгэр саха ытык көтөрдөрүн уруһуйдаабыта. Методистары кытта тыа филиалларыгар тахсан, билсиһэн туохха наадыйалларын сакааз ылан киирээччи. Кыргыттарын библиотекаҕа илдьэ кэлээччи, Мичил төрөөбүтүгэр үөрэн бөҕө библиотекаҕа биллэрбитэ.
Валерий Михайлович хараҕа куруук мичилийэ сылдьааччы. Эйээркэй куолаһынан ыллаан библиотека тэрээһиннэрин киэргэтээччи.
Валерий биhикки биир үтүө сайын, ол саҕанааҕы кэм ирдэбилинэн окко мобилизацийаланан, Ньурба сопхуоска үлэлээбиппит. Икки буолан сопхуос лаҥха буолбут ходуһатыгар ый кэриҥэ балаакканан сытан оттообуппут. От бөҕөнү хоторботохпут буолан баран, аһары үчүгэйдик сынньанан, бэриллибит былааны толорон – тэрилтэбит обществоҕа иэһин төлөөбүппүт. Валерий чахчы айылҕаҕа чугас этэ, оттуу сылдьан хоһоон да хоһуйбута, иэйдэҕинэ ырыа да ыллаабыта. Сарсыардаттан үөрэн-көтөн уһуктаат, ыллыы-ыллыы чэй оргутан, ас астаан тилигирэйээччи, киэһэ өттүгэр кутаа таһыгар эбэтэр чүмэчи уотугар хоһоон, үгэ суруйааччы. Сороҕор саатын сүгэн чугастааҕы уулары кэрийээччи, кэпсээн – ипсээн кэhиилээх кэлээччи. Сүрдээх ыалдьытымсах этэ, кэлэр барар дьону кытта булгу күө-дьаа кэпсэтэн, дьээбэлэhэн күлэ-үөрэ олороро бу баарга дылы.»
