Балаҕан ыйын 27 күнүгэр Киирэп Д. И. Николаев аатын сүгэр орто сүһүөх оскуолатыгар үөрүүлээх быһыыга судаарыстыбаннас күнүн бэлиэтээтибит.

Бу күн Сахабыт республикатын гимнэ тыаһаата,үөрүүлээх линейкаҕа мустубут оҕолорго Саха Өрөспүүбүлүкэтин суверенитета ылыныллыбытыгар өҥөлөөх П. А. Ойуунускай, М. К. Аммосов, Исидор Барахов курдук сүдү дьоннорбут устуоруйатын билиһиннэрдибит, Саха Өрөспүүбүлүкэтэ Россия Федерациятын иһигэр бэйэтин бэйэтэ дьаһанар сувереннай,демократическай субьект буолуутун ситиһиигэ сүҥкэн хардыы оҥоһуллубутун сиһилии библиотекарь Николаева А. И. кэпсээтэ.

Саха сирин былааҕын,дьаралыгын,конституциятын туһунан Киирэптээҕи олохтоох кулууп специалиһа Антонова А. В. сырдатта. Дойдубут сайда, үүнэ,чэчирии турарын туһугар бары биир санааннан салайтаран үөрэниэххэ, үлэлиэххэ диэн баҕа санаа этилиннэ.