2012 сылтан Дойдулар икки ардыларынааҕы суруйааччылар сойуустарын түмсүүлэрин, Саха Өрөспүүбүлүкэтин суруйааччыларын сойууһун чилиэнэ, прозаик Ангелина Николаевна Данилова быйыл, 2025 сылга 75 сааһын бэлиэтиир үбүлүөйдээх сыла.
Кини 1950 сыллаахха Таркаайы нэһилиэгэр төрөөбүтэ. Марха орто оскуолатын бүтэрэн, бухгалтер идэтин ылан үлэтин ыраах Ыраах Усуйаана улууһуттан саҕалаабыта. Салҕыы Орджоникидзевскай оройуоҥҥа үлэлээн баран дойдутугар Ньурба Таркаайытыгар кэлэн сопхуоска, Сбербааҥҥа үлэлээн сынньалаҥҥа тахсыбыта.
Ангелина Данилова суруйар эйгэҕэ холоммута, икки тылынан: сахалыы уонна нууччалыы тылларынан айар-суруйар буолбута олох эрдэттэн эбит. Суруйбут суруйууларын киэҥ эйгэҕэ таһаарбакка, бэйэтин кытта илдьэ сылдьыбыт. Улуустааҕы «Ньурба», «Огни Ньурбы» хаһыаттарга корреспонденнаабыта. Марха орто оскуолатын иһинэн тэриллибит “Хатыҥчаана” оҕо телестудиятыгар таһаарыылаахтык үлэлээбитэ. Ону таһынан Анатолий Герасимович Иванову кытта кылгас тэттик киинэлэри устан дьон -сэргэ биһирэбилин ылбыттара.
2001 сылтан суруйара биллэн барбыт. Ангелина Данилова тута ааҕааччытын булбут, саҥаттан саҥа айымньыларын кэтэһэр, сырса сылдьан ааҕар сүгүрүйээччилэрдээх суруйааччы буолар.
Билигин Нам улууһугар олорор, талааннаах биир дойдулаахпыт Ангелина Николаевнаны үбүлүөйдээх сылынан эҕэрдэлиибит. Айар үлэтин ыллыгар ситиһиилэри, чэгиэн-чэбдик туругу, үгүс-элбэх үөрүүлэри баҕарабыт!
Киин бибилэтиэкэ бастыҥ ааҕааччыларын, истиҥ доҕотторун ааҕыыларыгар Ангелина Данилова 2019 сыллаахха бэчээккэ тахсыбыт “Кимиэхэ да кэпсэммэтэх кэпсээн” кинигэтиттэн аҕыйах кэпсээни эһиги истиигитигэр таһаарабыт.
Сиһилии бу сигэнэн медиацентр ханаалыгар истиэххитин сөп
