Ньурбатааҕы киин бибилэтиэкэ ситимигэр «Кулун тутар ый — Өксөкүлээх ыйа»
Кулун тутар 21 күнэ—куукула оҥорооччулар күннэрэ.
Саха литературата үөскээбитэ 125 сылын бэлиэтиир 2025 сылга Өксөкүлээх ыйыгар «Саха дьахталларын мэтириэттэрэ» айымньытын тула үлэ былырыын саҕаламмыта. Былааҥҥа эрдэ киирбитинэн Г.Д.Федорова салайар Ньурбатааҕы «Сыахай эйгэтэ» түмсүү талааннаах Далбардарын ыҥыран биир санааҕа кэлэн «Саха дьахталларын мэтириэттэрэ» айымньыны күргүөм ааҕыыттан, ким ханнык уобараһы куукула оҥороруттан быһаарсыынан быйылгы «Өксөкүлээх ыйыгар» үлэбит саҕаламмыта. Салҕыы үлэҕэ көмөлөһүннэрэн Иннокентий Пестряков бу айымньыга үлэлэрин булан көмөлөһүннэрбиттэрэ.


Саха былыргы олоҕун да, аныгы да олоҕун-дьаһаҕын, сиэрин-туомун, үгэстэрин мындырдык уонна арылхайдык көрдөрөр саха чаҕылхай уруһуйдьута, Худуоһунньук Иннокентий Юрьевич Пестряков ньурбалар биһиги күтүөппүт буоларын үгүспүт билбэт. Кини тапталлаах кэргэнэ Хаҥаласпыт нэһилиэгэр төрөөбүт, улааппыт, Ивановтар улахан дьиэ кэргэн кыра кыыһа, билигин Саха государственнай театрын главнай администратора, СӨ култууратын туйгуна Варвара Семенова Пестрякова. Бүгүҥҥү тэрээһиҥҥэ Иннокентий Пестряков туһунан кэргэнин балта, Антоновкатааҕы орто оскуола саха тылын уонна литературатын учуутала Матрена Валерьевна Ли кэпсээнэ мустубут дьон интириэһин тарта. Варвара Семеновна бииргэ төрөөбүт эдьиийэ, Убайаан олохтооҕо, доруобуйа харыстабылын бэтэрээнэ Елизавета Семеновна Саввинова тэрээһин күндү ыалдьыта буолла.


Өксөкүлээх Өлөксөй «Саха дьахталларын мэтириэттэрин» 2017 сыл ахсынньытыгар оччолорго “Олоҥхо” театрын директора, билигин култуура миниистэрин солбуйааччы Мария Васильевна Турантаева өйүгүнэн (идеятынан) Роман Дорофеев моноспектакль туруорбута. Сэттэ уобараһы барыларын биһиги биир дойдулаахпыт, Маартан төрүттээх Саха театрын артыыската Лена Маркова айбыта, толорбута. Бу күннэргэ дойдутугар кэлэ сылдьан Лена Дмитриевна “Сыахай эйгэтэ” оҥорбут куукулаларын Ньурба куорат үөрэнээччилэригэр билиһиннэрбитэ олус кэрэхсэбиллээх.
Тэрээһиммитин Ньурбабыт артыыскалара, СӨ үтүөлээх артыыскалара Александра Константиновна Кривогорницина, Венера Анатольевна Никитина, норуот талааннааҕа Александра Васильевна Догуева талба талааннарынан ситэрэн-тупсаран биэрдилэр.


Өксөкүлээх Өлөксөй суруйан хаалларбыт «Саха дьахталларын мэтириэттэрин» куукулаҕа дьүһүйбүт «Сыахай эйгэтэ» кимнээхтэрий?


Салайааччылара Ньурбабыт дьиҥнээх патриота Галина Дмитриевна Федорова, түмсүүнү төрүттээччи, куукула оҥоруутун бастакынан Ньурбаҕа саҕалаабыт Ньургуйаана Николаевна Васильева, «Аленушка» оҕо уһуйаанын баспытаатала Семенова Антонина Максимовна, урбаанньыт Попова Татьяна Павловна, “Кыталык” КД худуоһунньуга Софронова Туяра Александровна, «Татыйыына» фирма үлэһитэ Ощепкова Марина Алексеевна,. К.Д.Уткин аатынан түмэл үлэһитэ Терехова Прасковья Дмитриевна уонна биэнсийэлээхтэрбит да диэтэллэр олох оргуйар үөһүгэр сылдьар Михайлова Валентина Васильевна, Петрова Домна Егоровна, Антонова Мария Васильевна.
Илиинэн оҥоһук бары көрүҥэр талба талааннаах Далбар Хотуттар «Саха сиригэр 2023-2027 сыллары Өксөкүлээх Өлөксөй сыллара» хамсааһыҥҥа кыттыыны ылан бэйэлэрин кылааттарын уктулар. Инникитин бу оҥоһуктара өссө киэҥ сирдэринэн тапталлаах Ньурбабыт аатын дорҕоонноохтук ааттатыахтара диэн эрэниэҕиҥ!
«Өксөкүлээх өрүү тыыннаах»…







