Саха Өрөспүүбүлүкэтин Бастакы Президенэ Николаев Михаил Ефимович ыйааҕынан 1996 сыл олунньу 13 күнэ — төрөөбүт төрүт тыл, сурук-бичик күнүнэн биллэриллибитэ быйыл 30 сыла. Ийэ тыл, сурук-бичик күнүн чэрчитинэн сахалыы таба суруйуу үөрүйэҕин олохсутар, иҥэрэр сыаллаах «Сахалыы дьыктаан» аахсыйа 12 төгүлүн ыытыллар.
Быйылгы аахсыйаҕа Суорун Омоллоон «Чүөчээски» кэпсээниттэн Толугур алаас туһунан 206 тыллаах дьыктаан сурулунна.
Ф.Г.Сафронов аатынан киин бибилэтиэкэҕэ, олунньу 14 күнүгэр араас идэлээх, араас саастаах 41 Ньурба куорат олохтоохторо түмсэн икки саалынан — икки түһүлгэҕэ — арахсан дьыктааны суруйдулар.
Бастакы түһүлгэҕэ, 23 киһиэхэ дьыктааны суруйтарда. «Ньурба уоттарын» билиҥҥи үлэтин сүрүннэһээччи, кинигэ хомуйан оҥорооччу, СӨ учууталларын учуутала, СӨ үөрэҕириитин туйгуна, «Ньурба улууһун социальнай-экономическай сайдыытыгар кылаатын иһин» бэлиэлээх Луиза Акимовна Канаева.
Иккис түһүлгэҕэ, 18 киһиэхэ, дьыктааны суруйтарда «Ньурба уоттарын» эдэр чилиэнэ, К.Д. Уткин аатынан Норуоттар доҕордоһуулара түмэл үөрэх салаатын салайааччыта, 2025 сыл түмүгүнэн Ньурбатааҕы култуура уонна ыччат политикатын департаменын «Үрдэл» анал аат кыайыылааҕа Александра Петровна Иннокентьева.
Өрүү кыттар, дьыктаан суруйуутун биһириир ааҕааччыларбытыгар күүскэ махтанабыт. Сылын аайы дьыктаан ыытыллыаҕыттан кытталлар Антонина Васильевна Ксенофонтова, кэргэннии Розалия Николаевна, Петр Афанасьевич Николаевтар. Тэрийээччилэри, киин бибилэтиэкэ үлэһиттэрин, быйылгы дьыктааҥҥа эдэр саастаах дьоммут күргүөмүнэн кэлбиттэрэ олус үөртэ.
Сахалыы ааҕыы холобурун көрдөрөр эдэр ыал врач Наталья Анатольевна, Ньурба ыччатын лидера Айсен Басангавич Убушаевтар холобурдарын суоллаан кэлэр дьыктааннарга дьиэ кэргэнинэн кэлээччи элбиирэ, Ньурба оройуонун култуураҕа уонна ыччат политикатыгар департамена, салайааччыбыт Розалия Михайловна Тихоновалыын уонна «Ньурба» хаһыат, редактор Лена Ивановна Петровалыын бука бары үлэһиттэр кыттыыны ылыыларын атын тэрилтэлэр батыһаллара буоллар диэн, баҕа санаа күүһүрэр.
«Сахалыы дьыктаан» аахсыйа кыайыылаахтара,
БАСТАКЫ түһүлгэҕэ —
«БАСТЫҤТАН БАСТЫҤ СУРУКСУТ» — Ефремова Наталья Михайловна
«БАСТЫҤ СУРУКСУТ» — Убушаева Наталья Анатольевна
«ҮЧҮГЭЙ СУРУКСУТ» — Васильева Александра Германовна
ИККИС түһүлгэҕэ —
«БАСТЫҤТАН БАСТЫҤ СУРУКСУТ» — Антонов Геннадий Владимирович
«БАСТЫҤ СУРУКСУТ» — Васильева Евдокия Владимировна
«ҮЧҮГЭЙ СУРУКСУТ» — Афанасьева Наталия Будимировна
Төрөөбүт төрүт тылбытын илдьэ сылдьар, сахалыы дьыктаан аахсыйаҕа кыттыбыт бары ааҕааччыларбытыгар бастыҥ махтал буоллун!
Төрөөбүт төрүт тылбытынан ааҕыҥ, суруйуҥ, сахалыы саҥабытын, сурукпутун-бичикпитин илдьэ сылдьыҥ!
