Оҕуруоппут килэс гынна,

Күҥҥэ үөрэ үүнэн барда,

Аһын биэрэр кыаҕын ылла,

Сири булан сириэдийдэ!

Дьикти араас сибэккитэ

Дьиэрэҥкэйдии үҥкүүлээтэ.

Дьирибинии лыаҕа  дайда,

Дьоллоох кэми уруйдаата.              Таисия Ноговицына.

От ыйын 17 күнүгэр Ф. Г. Сафронов аатынан киин бибилэтиэкэ уонна оройуоннааҕы бэтэрээннэр сэбиэттэрин көҕүлээһиннэринэн «Оҕуруотчукка сүбэлэр» диэн маастар кылааһы өрөспүүбүлүкэҕэ биллэр оҕуруотчут Агафья Афанасьевна олус сэргэхтик ыытта.

 Эдэр сааһыттан оҕуруотунан утумнаахтык дьарыктанар Агафья Тарасова  бэйэтин баай ис хоһоонноох уоппутуттан үллэһиннэ:  үүнээйи олордуу кистэлэҥнэрин, элбэх сыллаах сибэккилэри, клубниканы, моонньоҕону, кыһыл хаптаҕаһыүүннэрэри, бэйэ үүннэрбит оҕурсууттан, помидортан сиэмэни ыларга, перегной, сапропель, лабыкта туһатын туһунан олус туһалаах сүбэлэри биэрдэ.

Маастар кылаас кыттааччылара истиҥник сэһэргэһэн, араас боппуруостарыгар толору эппиэттэри истэн, элбэх сүбэ-соргу ылан түмүккэ Агафья Афанасьевна бэйэтин үүннэрбит үүнээйитин сиэмэлэрин, «Саҥа саҕалыыр оҕуруотчукка көмө таһаарыы. (Помидор)»брошюратын атыылаһан, үөрэн-көтөн, дуоһуйан тарҕастылар.

Ааҕааччылары кытта үлэлиир салаа.