Сайылык күнүн көрсө Ньурбатааҕы үһүс нүөмэрдээх алын сүһүөх оскуолатын 1 б кылааһын үөрэнээччилэригэр бүгүн тэрээһин ыыттыбыт.

Сайын, сайылыкка көһүү, сиэр-туом туһунан кэпсэттибит, айылҕа тыаһын истэн чуумпуран ыллыбыт. Төрөппүттэрэ астаабыт дыргыл сыттаах минньигэс алаадьыларын оҕолор астына сиэн сүргэлэрэ көтөҕүлүннэ.

Сайын кэлбит үөрүүтүгэр таһырдьа тахсан оскуола таһыгар үүнэн турар хатыҥнарга салама ыйаатыбыт, алаадьынан, үүтүнэн сири аһаттыбыт.

Бу кэлбит самаан сайыммыт барыбытыгар үтүөнү, сырдыгы эрэ аҕаллын, ынах-сүөһү, оҕо-уруу этэҥҥэ буоллун диэн көрдөстүбүт. Оҕолор бүгүн элбэх саҥаны биллилэр, иһиттилэр. Аны күһүн улаатан, сайдан кэлиэхтэрэ, үөрэххэ-үлэҕэ дьаныардаахтык ылсыахтара диэн баҕара хааллыбыт.