Ыам ыйын 22 күнэ – Саха халандаарынан сайыҥҥы күн ааҕыллар. Кэҕэ этэр. Уһун кыһыны туораан, күөххэ үктэнэр Ньукуолун күнүгэр алаадьы астаан сири-уоту аһаталлар. Айыылартан өҥ дьыл буоларыгар көрдөһөллөр, ыраастаналлар.
Итиитинэн илгийэн,
Куйааһынан курбуулаан,
Дьикти, мааны күн үүннэ,
Ньукуолуммут күннээтэ.
Сергей Васильев – Бороҕоонускай аатынан култуура уонна сынньалаҥ пааркатыгар Ньурба куорат дьаһалтата Ньукуолун күнүн тэрийдэ. Ф.Г. Сафронов аатынан киин бибилэтиэкэ үлэһиттэрэ бу тэрээҥиҥҥэ кыттан хамаандаларга «Ойон-тэбэн биэриэххэ!» көрдөөх эстафетаны, «Саха мындыр, өйө чөл!» тургутугу ыыттылар.
Кэлбит аҕам саастаах дьон сүргэлэрэ көтөҕүллэн, оҕолуу үөрэн-көтөн, астына-дуоһуйа сынньаннылар.
Кэлэн иһэр сайыммыт
Аһын — үөлүн дэлэйдик,
Куду анньан бэристин,
Дьонун дьолун түстээтин!
Санаа бары кэрэҕэ,
Кэскиллэргэ туһулан,
Эйэ курдук үтүөнү,
Сиргэ ыытан сириэдит!
Таисия Ноговицына.
