Бүгүн ахсынньы ый 15 күнүгэр биир дойдулаахпыт СӨ биллиилээх государственнай, общественнай-политическай деятелэ, СӨ бочуоттаах олохтооҕо, оройуон историятыгар салайар үлэҕэ үрдүк таһаарыылаахтык үлэлээн ааспыт, чаҕылхай салайааччы Варвара Андреевна Петрова төрөөбүт күнэ.
Өрөспүүбүлүкэ салалтатыттан саҕалаан номоххо киирбит салайааччы В. А. Петрова туһунан оройуон общественноһа, төрөөбүт Үөдэйин, үлэһит буолбут Хаҥалаһын нэһилиэктэрэ, В. А. Петрова аатынан кыраайы үөрэтэр түмэл бу сыллар тухары кини аатын үрдүктүк тутан элбэх тэрээһиннэри, көрсүһүүлэри ыытан кэллилэр. 2021 сыллаахха В. А. Петрова төрөөбүтэ 85 сылыгар анаммыт “ Мы помним их имена” диэн Ньурба оройуонун нэһилиэктэрин икки ардыгар ыытыллар эстафетаҕа оройуон бары нэһилиэктэрэ, Ньурба куорат кыттыыны ылан араас хабааннаах тэрээһиннэри ыыппыттара.
Биир историческай, сырдык умнуллубат өйдөбүлү хаалларбыт түгэннэринэн улуус баһылыга А. М. Иннокентьев салайааччылаах, К. Д. Уткин аатынан норуоттар доҕордоһуулара музей директора А. А.Туманова, Үөдэй нэһилиэгин баһылыга М. П. Николаева Хаҥалас оскуолатын директора Л. Н. Васильев уо.д.а састааптаах делегация Варвара Андреена үлэлээн ааспыт Муома, Абый улуустарыгар сылдьыылара этэ.
Үбүлүөйдээх сыл СӨ норуодунай суруйааччыта Наталия Михалева — Сайа Саха НКИХ режиссера Нина Саввична Корниловалыын В. А. Петрова аатынан кыраайы үөрэтэр түмэлгэ кэлэн, Варвара Андреевна икки үйэни сирэйдиир салайааччы быһыытынан үлэлээн-хамсаан ааспытын көрдөрөр «Хотун ийэ баһылык» документальнай киинэ устуутугар үлэлээн барбыттара.
Сэтинньи ыйга оройуоннааҕы үөрэх салаата, Н. И. Кочнев аатынан Хаҥалас орто оскуолатын, түмэл тэрийиилэринэн куйаар ситимин нөҥүө Зуум платформаҕа В. А. Петрова олоҕор, үлэтигэр анаммыт Республиканскай научнай практическай конференция ыытыллыбыта. 4-с «Ее имя присвоено» секцияҕа олохтоох оскуола 10-с кылааһын үөрэнээччитэ Виолетта Иванова (сал.Третьякова А. А.) бастакы миэстэни ылбыта.
Сыл устата нэһилиэккэ олохтоох оскуолаҕа кылаас чаастара, музейнай, библиотечнай уруоктар, быыстапкалар, кыраайы үөрэтэр түмэлгэ көрсүһүүлэр тиһигин быспакка ыытыллыбыттара.
2021 сыллаахха биир дойдулаахпыт СӨ муниципиальнай сулууспа туйгуна, кыраайы үөрэтээччи Васильева Александра Петровна бэлэмнээбит «Норуотум көтөр кынатым, үлэм үҥэр таҥарам» — диэн кинигэтэ Ньурба оройуона МО үбүлээһининэн ааҕааччы киэҥ араҥатыгар ананан тахсыбыта.
Саха норуотун, Ньурба сирин хорсун-хоодуот, ньургун дьахтара Варвара Андреевна Петрова олорбут олоҕо, охсуспут охсуһуута, айымньылаах үлэтэ төрөөбүт норуотугар, ньурбатын дьонугар-сэргэтигэр мэлдьи махталынан ахтылла, үлэннэн уруйдаммыт албан аата ааттана туруоҕа диэн туран, Варвара Андреевна бэйэтэ эппит кэскиллээх тылларынан түмүктүөхпүн баҕарабын:

«Мөлтөөн-ахсаан биэрбэккэ, биир сүбэни тобулан, биир суолу тутуһан олордохпутуна, таһаарыылаахтык үлэлээтэхпитинэ-хамсаатахпытына ситиһии, инникигэ хорсун хардыы оҥоһулла туруоҕа” — диэн. Оннук да буола турдун.

Мария Николаева, библиотекарь.