2022-2031 с.с Россияҕа наука уонна технология уон сыла
Биир дойдулаахпыт Ньурба оройуонун Хаҥалас нэһилиэгэр күн сирин көрбүт, техническай наука доктора, профессор, итиинэн, гааһынан хааччыйыы уонна салгыны ырааһырдыы үрдүк квалификациялаах инженера Кылатчанов Альфред Павлович быйыл төрөөбүтэ 75 сыла туолар.
Альфред Павлович 1948 сыллаахха бэс ыйын 14 күнүгэр Хаҥаласка тыа сирин биир киэн туттар интеллигент ыалыгар, учууталлар дьиэ кэргэттэригэр Аҕа дойду сэриитин ветерана, РСФСР үөрэҕириитин туйгуннара Павел Павлович уонна Наталья Иосифовна дьиэ кэргэнигэр төрөөбүтэ.Альфред оҕо сааһа Мархаҕа ааспыта, манна үөрэнэн оскуоланы бүтэрбитэ.
Үөрэххэ дьоҕурдаах уол ордук туочунай, естественнай наукаларга уһулуччу билиилээҕэ. Оскуоланы бүтэрээт Горьковскайдааҕы инженернай строительнай институтка ситиһиилээхтик үөрэнэн, инженер идэлээх Дьокуускайга кэлэн, СГУ инженернай техническэй факультетыгар студеннары үөрэтэн саҕалаабыта.Кэскиллээх педагог оччотооҕу сэдэх идэҕэ техническай кадрдары бэлэмнээһин бастакы олугун уурсубут киһинэн буолар. Салгыы Ленинград куоракка научнай үлэтигэр стажировканы ааспыта, СГУ ИТФ итиинэн, гааһынан хааччыйыы уонна салгыны ырааһырдыы кафедратын сэбиэдиссэйинэн үлэлээбитэ.Салайааччы, үөрэтээччи быһыытынан Сахатын сиригэр инженердары бэлэмнээһҥҥэ элбэх сыратын, билиитин ууран үлэлээбитэ.
1996 сыллаахха Москватааҕы Государственнай университет Учуонай Сэбиэтигэр диссертациятын туйгуннук көмүскээн, Альфред Павлович Кылатчановка Техническэй наука Докторын үрдүк аата иҥэриллибитэ.Кини 60-тан тахса научнай үлэлэри, монографиялары суруйбута,3-с научнай арыйыыта Российскай патент ылбыта.
РФ Президена Владимир Путин 2022-2031 сыллары Россияҕа наука уонна технология уон сылынан биллэрбитэ. Бу күннэргэ биир дойдулаахпыт техническай наука доктора Альфред Павлович Кылатчанов үбүлүөйдээх сылыгар анаан В.А.Петрова аатынан кыраайы үөрэтэр түмэлгэ “Инженерами не рождаются, инжнерами становятся” диэн быыстапка Альфред бииргэ төрөөбүт балта, Алроса ветерана Марианна Павловна бэлэхтээбит материалларыгар олоҕуран турда.
Кылатчановтар аҕа ууһа биһиги нэһилиэкпит остуоруйатыгар биир дьоһун миэстэни ылаллар. Аҕа дойду уоттаах сэриитигэр биир дьиэттэн 4 сэрии кыттыылаахтарын-бырааттыы Кылатчановтар бойобуой суолларын туоһута буолбут өйдөбүнньүк Мэҥэ таас Мас Арыы уонна Мииһээн сыһыыларын ыпсалҕаннарыгар ууруллубута.
Чахчыта да, инженер буолан төрөөбөттөр, инженер буолан уһуйуллан тахсаллар. Хаҥалас сиригэр киинин түһэрбит, техническэй наука доктора Альфред Павлович Кылатчанов бэйэтин кэмигэр техническэй наука өттүнэн элбэх үлэлэри ыыппыта, тыйыс усулуобуйалаах Сахатын сиригэр итииннэн, гааһынан хааччыйыы уонна салгыны ырааһырдыы курдук кэскиллээх үлэлэргэ улахан учуонай буолан үүммүтэ, айбыта биир дойдулаахтарыгар,эдэр ыччакка мэлдьи махталынан ахтылла, үөрэтиллэ турдун!
Бүгүн от ыйын 13 күнүгэр биир дойдулаахпыт техническэй наука доктора Альфред Павлович Кылатчанов төрөөбүтэ 75 сылыгар анаммыт,олоҕун, айар үлэтин билиһиннэрэр тэрээһин олохтоох түмэлгэ Ньурбаттан тахсыбыт ыалдьыт эдэр ыччаттары кытта сэргэхтик ааста.
М. Николаева, библиотекарь.
