Мэҥэдьэк

Мэҥэдьэктээҕи олохтоох бибилэтиэкэҕэ сахабыт тылын сайыннарар, билиибитин хаҥатар «Саха тылын төһө билэҕин?» биктэриинэ оонньуу ыытылынна. Нэһилиэк олохтоохторо «Утум» аҕам саастаахтар түмсүүлэрин чилиэннэрэ, олохтоох дьаһалта үлэһитэ, И. Я. Танхаров аатынан култуура киинин эдэр үлэһиттэрэ кыттыыны ыллылар. Оонньооччулар 2 хамаандаҕа арахсан «Айар» уонна “Бичик” диэн ааттаннылар. Маҥнайгы түһүмэххэ С.А.Новгородов туһунан кылгас иһитиннэрии, презентация көрдүлэр, 2 түһүмэҕинэн төрөөбүт тыл туһунан биктэриинэ 20 боппуруоһугар эппиэттээтилэр, 3 түһүмэххэ “поле чудес” оонньуу быраабылатынан тылы таайдылар. 4 түһүмэххэ С. А. Новгородов оҥорбут алпаабытынан суруллубут Күннүк Уурастыырап хоһоонун сахалыы тылбаастаатылар. Түмүккэ, “Бичик” хамаанда муҥутуур кыайыылаах аатын сүктэ. Кыайыылаахтарга добун, туоһу суруктар, сэмэй бэлэхтэр туттарылыннылар. Төрөөбүт тылбыт сайдарын туһугар хас биирдии киһи сахалыы саҥара, тылын сайыннара сырыттаҕына – омук быһыытынан симэлиймиэхпит суоҕа.

Матрена Габышева, Мэҥэдьэк.

Таркаайы

Таркаайы бибилэтиэкэтигэр Семен Данилов биир сэһэнинэн нэһилиэк бочуоттаах олохтоохторо аахпыттан суруйууну суруйдулар, кинигэ уларыстылар, журнал көрдүлэр. Ону тэҥэ «Кэскил» оҕо уһуйааныгар кинигэ быыстапката турда.

Иванов Р. М.