Муус устар ый саҥата өрөспүүбүлүкэ эр дьонугар үс бүк үөрүүлээх түгэни тосхойор. СӨ бэрэсидьиэнин 1999 сыл олунньу 15 күнүнээҕи ыйааҕынан, муус устар бастакы баскыһыанньатыгар Аҕа күнүн бэлиэтиир буолбуппут. Ил Дархан 2017 сыл олунньу 6 күнүнээҕи ыйааҕынан, муус устар ый иккис баскыһыанньата Уол оҕо күнүнэн биллэриллибитэ. Онтон муус устар 5 күнүгэр Булчут күнэ бэлиэтэнэр. Быйыл өрөспүүбүлүкэбитигэр Үлэ сыла биллэриллибитэ.

    Муус устар 7 күнүгэр бу күннэр чэрчилэринэн  Оҕо уонна Ыччат бибилэтиэкэтэ  «ТОК. Толкуйдаа ! Оонньоо ! Кыай !»  бэртээхэй  тэрээһини ыытта. Тэрээһиҥҥэ Ньурба куораттан үс тэрилтэ  — Ростелеком, Ньурбатааҕы РЭС, ОДЬКХ  эдэр аҕаларын хамаандалара кытыннылар. Сэргээччилэринэн бу тэрилтэлэр үлэһиттэрэ уонна Ньурбатааҕы техникум устудьуоннара буоллулар.

  Күрэҕи Яна Васильевна Ушканова иилээн-саҕалаан ыытта. Бэйэтин эҕэрдэ ырыатынан  ускуустуба оскуолатын үөрэнээччитэ Эмилия Егорова киэргэттэ.

Дьүүллүүр сүбэҕэ куорат дьаһалтатыттан сиргэ, баайга-дуолга сыһыаннаах салаа исписэлииһэ Ю.Н.Илларионов, Ф.Г.Сафронов аатынан Бибилэтиэкэ үлэһиттэрэ М.Р.Ноева, И.И.Павлова үлэлээтилэр. Түмүк тахсар кэмигэр М.Г.Огочоева көрөөччүлэргэ интэриэһинэй тургутук ыытта.

    Күрэх 6 түһүмэҕинэн ыытылынна, ол курдук бултка-алтка, сиэргэ-туомҥа, дьиэ кэргэҥҥэ, оҕо иитиитигэр сыһыаннаах сорудахтар оонньоннулар. Тыҥааһыннаах киирсии түмүгүнэн кыайыылааҕынан   Ньурбатааҕы РЭС  хамаандата таҕыста. Иккис миэстэҕэ ОДЬкХ, үһүс миэстэҕэ Ростелеком хамаандалара тигистилэр.

    Маннык көхтөөх тэрээһиннэр эдэр ыччат билиитин хаҥатарга, бириэмэтин туһалаахтык атаарарыгар туһуланаллар, ааҕар аҕа ахсаанын элбэтэллэр.

Ааҕаачылары кытта үлэлиир салаа.