Аҕа дойду сэриитигэр Кыайыы 80 сылын бэлиэтиир тэрээһиннэр чэрчилэринэн ыам ыйын 6 күнүгэр киин бибилэтиэкэ ааҕааччыны кытта үлэлиир салаатын бибилэтиэкэрдэрэ Е.И. Софронова,  М.Р. Ноева  А.Н. Чусовской аатынан Ньурбатааҕы техническэй лицей үөрэнээччилэригэр уруок ыыттыллар.

Нэһилиэктэртэн үөрэнэр оҕолор  лицей интернатыгар олорон үөрэнэллэр. Бу интернатка үөрэх, үлэ чааһын кэннэ оҕолор уонна баспытааталлара Мария Ефимовна үөрэ-көтө көрүстүлэр. Сынньалаҥ хосторугар баар оҕо бары көхтөөхтүк муста охсон уруокпут саҕаланна.

Елена Ивановна «Кыайыы куолаһа -Юрий Левитан» диэн улуу диктор туһунан олус интириэһинэй кэпсээнин, саҥарар этиини,  тылы тупсарар эрчиллиилэри оҥотторбутун оҕолор сүрдээҕин сөбүлээтилэр.  Салҕыы Маргарита Романовна Арассыыйа Геройа А.Н.Григорьев-Тута туһунан дьиҥ баар матырыйаалларга олоҕуран билиһиннэрдэ, оҕолор сэргээн иһиттилэр, ыйытыктарга эппиэттэн сэргэх кэпсэтии таҕыста.

         Атын атын нэһилиэктэртэн, дьонноруттан-дьиэлэриттэн тэйэн үөрэх сырдык аартыгын тутуһа сылдьар оҕолор олоххо көхтөөхтөрө, билиигэ-көрүүгэ тардыһаллара олус үөрдэр. Биһиги инники кэскиллэрбит-оҕолор барахсаттар-инники дьылҕалара сырдык-сылаас, эйэлээх халлаан анныгар дьоллоохтук эрэ салаланнын!