Ыам ыйын 9 күнэ. Сарсыардаттан Кыайыыны уһансыбыт байыаннай ырыалар дуорайдылар. Акана нэһилиэгин дьаһалтатын дьиэтин иннигэр дьон-сэргэ тоҕуоруһа муһунна. Тэрээһини ыытааччылар Мотрена Максимова, Ульяна Сергеева мустубут дьону Улуу Кыайыы күнүнэн эҕэрдэлээтилэр, Кыайыыны уһансыбыт биир дойдулаахтарыгар махталларын биллэрдилэр.
Давид Туманов «День Победы» ырыатынан, мустубут дьон «ураа» хаһыытынан доҕуһуолланан Афанасий Васильев дьаһалта дьиэтин үрдүгэр Кыайыы кыһыл былааҕын күөрэччи аста. Нэһилиэк аҕа баһылыга Семёнов Е. М. сэлэлии хаамыыны салайда.
«Ким да умнуллубат, туох да умнуллубат» бааматынньык иннигэр тохтоон өйдөбүнньүк венок уурдулар, » Голос» бөлөх 4 кылаас үөрэнээччилэрэ Р. Рождественский «Реквием» поэматыттан быһа тардан аахтылар (сал. бибилэтиэкэр Павлова В.Л.). Албан аат түһүлгэтигэр салҕыы сэлэлии хааман кэллилэр, сэрии толоонугар охтубут, сут-кураан сылларга дьэҥкэрэр өлбүт, сэрииттэн төннөн кэлэн эйэлээх олоҕу тутуспут бэтэрээннэр көмүс ааттарыгар сүгүрүйэн чуумпуран, сөҥүөрэн турдулар, умуллубат уот иннигэр венок, сибэкки дьөрбөтүн уурдулар. Баһылык Ефрем Михайлович мустубут дьону Улуу Кыайыы өрөгөйдөөх күнүнэн эҕэрдэлээтэ, тыыл бэтэрээнигэр Александрова Т. Н. өйдөбүнньүк бэлэх туттарда. Анал байыаннай дьайыыга сырдык тыыннара быстыбыт хорсун хоодуот хотойдорбутун санаан-ахтан чуумпуран ыллыбыт. «Кыымчаан» үҥкүү бөлөҕүн үҥкүүһүттэрин, нэһилиэк кэрэ куоластаах ырыаһыттарын, «Чолбон» хоһоон ааҕааччы уоланнар эҕэрдэ кэнсиэртэрин көрдүбүт.
Олохтоох дьаһалта уонна ЖКХ тэрилтэлэрэ тэрийбит «Хонуу куукунатын» минньигэс хааһытын астына сиэтибит уонна оскуола оҕолоругар ыытыллыбыт «Эйэ! Успуорт! Маай!» эстафетаны сэргии көрдүбүт. Күрэҕи оскуолаҕа физкультура учуутала Новгородов Г. С. иилээн-саҕалаан ыытта.
Киэһэ Тойуктаах Марыына аатынан култуура киинигэр»Эйэлээх олоҕу түстүүбүт» оскуола үөрэнээччилэрин уонна тэрилтэ үлэһиттэрин икки ардыларыгар бөлөҕүнэн ырыа күрэҕэ ыытылынна. Күрэх 3 бөлөҕүнэн ыытылынна. Бастакы бөлөххө 1 үрдэл — 3 кылаас үөрэнээччилэрэ (кылаас салайааччыта Сергеева А.Н.) 2 үрдэл — 1-2 кылаас үөрэнээччилэрэ (к. с. Васильева М. А., Васильев М. Н.) 3 үрдэл — 4 кылаас үөрэнээччилэрэ (к.с. Герасимова С. П.) 2 бөлөххө: 1 үрдэл — 9,10,11 кылаастар (к/с Чуручанова С. В., Гуляева И. А., Сергеева У. Н.) 2үрдэл — 8 кылаастар (к/с Лукина А. А.) 3 үрдэл — 6-7 кылаастар (к/с Масанова Т.А., Иванова А. Ю.) 3 бөлөххө: 1 үрдэл — П. С. Егорова аатынан Акана орто оскуолата, 2 үрдэл — «Акана нэһилиэгэ» тыа сирин түөлбэтин дьаһалтата, 3 үрдэл — П. С. Егорова аатынан Акана орто оскуолатын уһуйаана. Бу курдук бүтүн нэһилиэгинэн патриотическай ырыалары ыллаан көрөөччүлэр истиҥ махталларын ыллыбыт. Күрэх кэнниттэн Албан аат түһүлгэтигэр «Өйдөбүнньүк чүмэчи» уонна «Кыайыы оһуохайа» аахсыйалара ыытылыннылар. Бары кыттыбыт дьоммутугар, оҕолорбутугар барҕа махтал. Дьоллоох, доруобай буолуҥ!
