Улуустааҕы култуура үлэһиттэрэ улахан пуорумҥа кытыннылар, идэлэрин үрдэтиннилэр
Улуустааҕы култуура уонна ыччат департаменын салайааччыта Розалия Тихонова кулун тутар 23 к. салайааччылар планеркаларыгар Дьокуускайга командировкатын туһунан сиһилии иһитиннэрдэ.
Култуура үлэһиттэрэ кулун тутар 16-20 кк. Арассыыйа норуоттарын сомоҕоһууларын сылыгар уонна Саха сиригэр Култуура сылыгар аналлаах өрөспүүбүлүкэтээҕи култуура пуорумугар кыттан кэллилэр. Ньурба дэлэгээссийэтэ пуорум былаһааккаларыгар көхтөөх кыттыытынан үчүгэй өйдөбүлү хаалларда. Улуустааҕы кииннэммит бибилэтиэкэ ситимин дириэктэрэ Юлия Васильева «Ийэ тыл – төрүт тыл» былаһааккаҕа тыл эттэ. Улуустааҕы киин бибилэтиэкэттэн 5 киһи аныгы технологияларга сыһыаннаах үөрэххэ идэлэрин үрдэтиннилэр.
Розалия Михайловна быйыл ааҕар балаҕаннар тэриллибиттэрэ 100 сыла буоларын, итинтэн бибилэтиэкэ историята саҕаламмытын этэн туран, Ньурба куоракка уонна нэһилиэктэргэ «Айар» национальнай кинигэ кыһатын дэлэгэсссийэтэ кэлэрин иһитиннэрдэ. Бу тэрээһин Култуура уонна духуобунай сайдыы министиэристибэтин үлэтин былаанынан ыытыллар.
Кулун тутар 20 к. куйаар ситиминэн СӨ Бырабыыталыстыбатын Бэрэссэдээтэлин солбуйааччыта Сергей Местников кыттыылаах, Ньурбаҕа Оҕо төрөөбүт тылынан ааҕыытын тарҕатар киин аһыллыаҕа. Итини таһынан «Ньурба оройуонун баянистара уонна гармонистара», «Ытык аҕа аата ыччатынан салҕанар» кинигэлэр, «Ньурба сахаларын кымыс бырааһынньыга: аат-суол кыаҕа» биир кэлим чинчийии (монография) сүрэхтэниилэрэ, «Айар» кинигэ кыһатын быыстапката ыытыллыахтара.
Планеркаҕа Розалия Тихонова бибилэтиэкэҕэ хаһыаттарга, сурунаалларга сурутууга улуустан харчы көрүллэрин туруорсубутун, улуус салалтата болҕомтоҕо ылла. Арассыыйатааҕы модельнай бибилэтиэкэ тэриллэр түгэнигэр, өрөспүүбүлүкэттэн үгүөрү суумалаах үп көрүллүөн сөп. Онон сурутууга харчы көрүллүүтэ манна төһүү буолуохтаах.
 
Улуустааҕы култуура уонна ыччат департамена.

Видео от Якутия 24