ОҔО СААҺА:

Василий Нехоруков Ньурба оройуонун Дьаархан нэһилиэгэр 1946 с. төрөөбүтэ. Соҕотох аҕа сэттэ оҕотун тыа сирин дьарыгар сыһыаран ииппит, төһө кыалларынан интэринээтинэн-ыалынан олордуталаан үөрэттэрбит. Василий Федорович аҕатыгар анаан суруйбут хоһоонун киэҥ эйгэҕэ иһитиннэрэбит:

Аҕабар.

Кыһынын: Оо, аҕам барахсан!

Таһаҕас тиэйэн кэлэргин кэтэһэн,

Атыҥ туйаҕын тыаһын истээри,

Сыарҕаҥ ыйылыырын иһиллэри:

Амырыын туманнаах тымныыга,

Ырдьаччы тоҥуохпар диэритин,

Сыгынньах, төбөбүн тоҥорон,

Тыһыргыыр кулгаахпын имитэн,

Төһөлөөх таһырдьа сүүрбүтүм буолуоҕай?

Сайынын: Оо, аҕам барахсан!

Оттоон, балыктаан кэлэргин кэтэһэн,

Өрүскэ эрдии тыаһын истээри,

Көхсүҥ кыыкыныырын иһиллээри:

Күнүһүн өҥүрүк куйааска,

Көлөһүн — балаһын алламмын,

Киэһэтин тумарык тумаҥҥа,

Бырдахха — кумаарга сиэтэммин,

Төһөлөөх биэрэккэ киирбитим буолуоҕай?

Күһүнүн: Оо, аҕам барахсан!

Бултуйан, кустаан кэлэргин кэтэһэн,

Атах сырдыргыыр тыаһын истээри,

Күүскэ сөтөллөргүн иһиллээри:

Ардахтаах инчэҕэй күннэргэ,

Силбиккэ илийэн, сытыйан,

Балысхан хараҥа халлааҥҥа

Ыйынан аартыгы сырдатан,

Төһөлөөх одуулуу турбутум буолуоҕай?

Сааһыары: Оо, аҕам барахсан!

Айантан сотору кэлэрин кэтэһэн,

Хаһан биллэр сураххын истээри,

Билэр дьон саҥатын иһиллээри:

Өрүс халаанныыр кэмигэр,

Ырааҕы-чугаһы билбэккэ,

Балысхан ууттан сэрэммэккэ,

Тиритэ-хорута, ыксаллык,

Төһөлөөх сиринэн тиэһинним буолуоҕай?

ҮӨРЭММИТ, ҮЛЭЛЭЭБИТ КЭМНЭРИН СЫРДАТТАХХА:

1969 сыллаахха Дьокуускайдааҕы финансовай техникуму бүтэрбит.

1978 сыллаахха Москубатааҕы бүтүн сойуустааҕы юридическэй институту бүтэрбит. Ньурба уонна Горнай оройуоннарын финансовай тэрилтэлэригэр үлэлээбит.

1972-79 сылларга Өлүөхүмэ оройуонугар финансовай отделга сэбиэдиссэйдээбит.

1980-88 сылларга Саха өрөспүүбүлүкэтин финансовай министиэристибэтин отделыгар начальниктаабыт.

1989-90 сылларга экология министиэристибэтигэр үлэлээбит. Кэлин судаарыстыба тас пенсионнай фондатыгар үлэлээбит.

1996 сыллаахха муус устар 9-с күнүгэр Бүтүн сойуустааҕы быыстапка сүбэтэ «Лауреат ВВЦ» түөскэ иилиллэр бэлиэнэн наҕараадалаабыт. Элбэх рационализаторскай оҥоһуга патеннаммыт. Дьиэ миэбэлин шкаф-купе, трансформер дьыбаан оҥорбут эбит. Биир киһи хайгыы көрөрө хоту сир ыстааданан көһө сылдьан үлэлииригэр иһигэр тимир оһохтоох соһуллар блок-дьиэтэ буолар.

АЙАР ЫЛЛЫК СУОЛУНАН

Кинигэлэрэ:

1. Өлбөт — сүппэт туһугар.

2. Хапсыһыылаах олох.

3. Харах уулаах таптал.

4. Имэҥ.

5. Умайбат, тимирбэт туһугар.

6. Тоҥмут чооруос.

Бу айымньыларын геройдара дьиҥ олоххо баар дьон. Араас быһылааннарга түбэспит дьон хайдах уолуйбакка дьаһаныаҕын, саха үгэһинэн сиэри-туому тутуһуоҕун бэлиэтии көрөн эдэр ыччаттарбыт олоххо итинник түбэлтэттэн бэйэлэрин бэринэн тахсарга үөрэтэр. Аҕыйах хонуктааҕыта Намнааҕы учууталы бэлэмниир колледж учууталлара В. Ф. Нехоруков кинигэлэрин үөрэтэр кинигэ гынан туһаныахха сөп эбит диэн ыйыталаһа сырыттылар диэн сонуну иһиттим. Нам коллеһыгар араас сатабылга үөрэтэллэрин киэҥ нэлэмэн Сахабыт сирин дьоно билэр буолуохтаах. Ааһа баран бэйэм ити үөрэх тэрилтэтин үөрэнэн бүтэрбит буоламмын билэбин. Саха сатабылыгар, тыа сирин дьоно ас-таҥас таһаарынар сатабылларыгар кытта үөрэтэллэр. Ону үөрэтэр учууталлар Дылбаныбыт суот-учуот, бултааһын-балыктааһын, сиэр-туом, уһаныы-айыы сатабылларын, мүччүргэннээх түгэнтэн быыһаныы ( билигин оскуола программатыгар баар ОБЖ уруогун хас биирдии аҕа уолугар уһуйуохтааҕын) бэйэтин уопутуттан суруйан эдэр көлүөнэҕэ хаалларбыт диэн мэлдьэҕэ суох.