Татьяна Прокопьевна Олесова  салайааччылаах Ньурба оройуонун бэтэрээннэр сэбиэттэрэ уонна  Киин бибилэтиэка ааҕааччыны кытта үлэлиир салаа үлэһиттэрэ үһүс көлүөнэ оскуолатын истээччилэригэр биир бырайыагынан үлэлээбиппит бэһис сыла. Бу сылга барыта 17 маастар кылаастар буоллулар. Харысхал арааһын, кыбытыктаах тигии, быысапка араас көрүҥэр, «ализе» сабынан, сотовай телефонунан туһаныы, оҕуруоту көрүү кистэлэҥнэрэ, Саҥа сыл бэлиэтин «моҕойу” оҥорууга маастар кылааһы тарбахтарыгар талааннаах библиотека чугас доҕотторо ыыттылар.

Сахабыт сирин биир маанылаах үүнээйитинэн — кытыан (можжевельник) буолар. Кытыан — бу биһиги тыйыс айылҕалаах хотугу дойдубут биир уйан үүнээйитэ. Кини төһө да 600 сыл уһуннук олордор, үүнэрэ олус бытаан, алдьаннаҕына-кээһэннэҕинэ оһорунара олус уһун уонна Сахабыт сиригэр бүтүннүүтүгэр тарҕанан тайаан үүммэт. Кытыан айылҕаҕа суолтата, үтүө дьайыыта олус улахан. Салгыны ыраастыыр, кыыл-сүөл аһылыктанар. Эмтээх үүнээйи быһыытынан эмиэ үрдүктүк сыаналанар. Ол сиэринэн бүгүҥҥү тэрээһиҥҥэ дойдубут кытыанын туһанныбыт.

Ахсынньы 27 күнүгэр үһүс көлүөнэ оскуолатын истээччилэрэ сылы түмүктүүр тэрээһиҥҥэ, саҥа сылы көрсө олорор дьиэлэрин, тулалыыр эйгэлэрин ыраастанарга туһалаах чүмэчи оҥостор маастар-кылааһыгар муһуннулар. Уһуйааччы Туяра Михайловна Алексеева Ньурбатааҕы уйулҕа киинин социальнай педагога кытыаннаах кутуу чүмэчи оҥоһуутун хас биирдии хаамыытын сиһилии кэпсээтэ, кистэлэҥнэрин арыйда. Маастар-кылаастан кыттыбыт дьон бары харысхаллаах ыҥырыа буоскаттан чүмэчи оҥостон, саҥа сылы көрсө дьиэбитин ыраастаныахпыт диэн үөрэн-көтөн дуоһуйан тарҕастылар.

Ф. Г. Сафронов аатынан Киин бибилэтиэкэтин ааҕааччыны кытта үлэлиир салаа.