Егор Поликарпов бэс ыйын 13 күнүгэр төрөөбүтэ 85 сыла.

Поликарпов Егор Михайлович  (1941 — 2021)

мелодист, самодеятельнай композитор,

Ньурба оройуонун «Дойду бэрдэ – Ньурба сирэ» саҥа Өрөгөй ырыа ааптара (08.06.2026 с. Ньурба МО депутаттарын Сэбиэтэ бигэргэттэ),

Саха Өрөспүүбүлүкэтин култууратын туйгун,  

Саха Өрөспүүбүлүкэтин үөрэҕириитин туйгуна,

 Саха Өрөспүүбүлүкэтин култууратын Үтүөлээх үлэһитэ,

Ньурба улууһун Бочуоттаах олохтооҕо,

50 сыл үлэлээбит Чуукаарын «Эйгэ» кулуубугар кини аата иҥэриллибитэ.

Бэс ыйын 13 күнүгэр Бизнес-инкубаторга мелодист, самодеятельнай композитор Егор Михайлович Поликарпов төрөөбүтэ 85 сылыгар аналлаах остуоруйа чааһа буолла. Саха Өрөспүүбүлүкэтин култууратын үтүөлээх үлэһитэ, Саха Өрөспүүбүлүкэтин  култууратын туйгуна, Саха Өрөспүүбүлүкэтин  үөрэҕириитин туйгуна, Саха Өрөспүүбүлүкэтин  «Үлэҕэ килбиэнин иһин» бэлиэ хаһаайына, Ньурба улууһун, Чуукаар, Акана нэһилиэктэрин бочуоттаах олохтооҕо, самодеятельнай композитор Егор Михайлович Поликарпов бэс ыйын 13 күнүгэр Ньурба улууһун Акана нэһилиэгэр төрөөбүтэ, Чуукаарга 1969 сыллаахха үлэлии кэлбитэ.

Чуукаарга кэлээт да аҕыйах оҕону куруһуок быһыытынан дьарыктаабыта, ордук Кыппыгыров Володя (Владимир Николаевич) олус систиэмэлээхтик баяҥҥа дьарыктаммыта.

Оскуола кэнниттэн Дьокуускайдааҕы музыкальнай училищеҕа үөрэммитэ. Егор Михайлович үлэлии кэлиэҕиттэн саҕалаан күн сириттэн барыар  диэри кулуупка, оскуолаҕа ырыа урогын чааһын биэрбитэ. Үлэтин быыһыгар араас тэрээһиннэргэ уус-уран самодеятельноска быһаччы кыттыбыта, салайбыта.

«Көмүскэл» иистэнэр сыах үлэһиттэрэ Егор Михайлович олоҕун, айар үлэтин туһунан бэсидэни иһиттилэр, кинигэ быыстапкатын кытта билистилэр. Сандара Игоревна мелодист айбыт ырыаларын остуоруйатын кэпсээтэ, Тимофей Иванович Шестаков – Чоххуруос баяҥҥа ырыалары оонньоон иһитиннэрдэ.  Түмүккэ истээччилэр  Сергей Васильев-Бороҕоонускай тылларыгар, Е.М.Поликарпов мелодиятыгар «Киэҥ Ньурба» ырыаны ыллаатылар.